Tschun en in plum

(anr/hh) Il giuven pur David Venzin ei buca surstaus pauc cura ch’ina da sias nuorsas ha fatg tschun tschuts dacuort. Il plascher seigi secapescha staus gronds. Nuorsas cun dus ni treis tschuts ein negin’excepziun. Quater ni schizun tschun enina ein lu gia eveniments singulars. D’in tal sa David Venzin selegrar.

Avon diesch dis ha ina da sias nuorsas numnadamein fatg tschun tschuts. «Quei ei enzatgei tut special e legra naturalmein, tonpli che tuts tschun han ussa surmuntau la fasa critica ed ein sauns e tafers», constatescha il giuven pur che ha in agen menaschi dapi l’entschatta digl onn vargau. In eveniment ei quei cunzun era perquei che Venzin ha saviu segidar cun la nuorsa enten parturir: «Ins ei lu schon surstaus empau cura che tschun vegnan sil mund en in plum.»

Sper las 50 nuorsas ch’el tegn a Fadretsch sut Curaglia, dispona el era d’in menaschi cun vaccas mummas. Suenter igl emprendissadi sco mecanist da maschinas agricolas ha el absolviu la scola da purs al Plantahof.

Il plascher da quei eveniment tut special en nuegl, mo era da far il pur ei bein veseivels vid Venzin ch’ei carschius si en ina famiglia purila.