35 milliuns per missiuns catolicas en Svizra

(cp) La Conferenza episcopala svizra e la Conferenza centrala roman-catolica svizra han publicau ina studia davart la situaziun dallas missiuns en lungatgs jasters en Svizra. Cun in concept general davart la pastoraziun dils migrants vul ins fixar la basa per la pastoraziun futura da quels. Ei va per normar la direcziun, organisaziun e finanziaziun da quella pastoraziun sin plaun naziunal, pia per mussar co formar da cuminonza la multifariadad culturala, linguistica e spirituala dalla Baselgia catolica. La studia muossa la situaziun actuala dalla pastoraziun dils migrants en Svizra. Rodund ina tiarza dils treis milliuns catolics en Svizra derivan dalla mi-graziun. Per lur pastoraziun s’engaschan 110 missiuns ni teams pastorals (2017). Quels organiseschan onn per onn en Svizra ca. 21 000 survetschs divins en 20 lungatgs e per part era en ritus specials.

Sclariment dat la studia era davart ils cuosts da quellas missiuns pils jasters. Ei setracta da 34,8 milliuns francs. Quels vegnan surpri per gronda part dallas Baselgias cantunalas. Il pli bia contribuescha la Baselgia catolica turitgesa cun 11 milliuns. Ca. dus milliuns, ni 6 %, ve-gnan dai dil post naziunal dalla Conferenza episcopala svizra per las missiuns en lungatgs jasters. La Baselgia catolica dil Grischun (Corpus Catholicum) ha impundiu igl onn vargau per la missiun croata, portughesa, taliana ed albanesa en nies cantun la summa da ca. 167 500 fancs.

Las missiuns cumpeglian savens pliras pleivs ni in entir territori ch’appartegn a divers uestgius. Las structuras seigien denton fetg complexas ed ina semplificaziun fuss fetg indicada. Ils resultats da quella studia sebasan sin ina retscherca ch’ei vegnida fatga online dil matg tochen il settember 2018 els ues-tgius, tier las organisaziuns cantunalas, il post da migraziun e las treis conferenzas regiunalas.