Buns tiarms fan ins gigins

DA CLAUDIO SPESCHA

Buns tiarms fan buns vischins. Dian ins. Schliats tiarms fan mo schaschins. Dian ins buc. Pudess ins concluder. Forsa. Perquei eis ei meglier da far tiarms cun esser gigins. Per evitar da quels schaschins. Schaschins sco quels dalla famiglia da purs protestants che steva cun sia casa exact sil cunfin cura che l’Irlanda e la Gronda Britannia han fatg lur tiarms igl onn 1920, suenter l’uiara d’independenza irlandesa.

La stiva era dalla vart britannica, ell’Irlanda dil nord, pia en tiara protestanta, las combras da durmir dalla vart irlandesa, pia catolica. Ei ha dau in ver viriveri birocratic ed in vi e neu politic – e garantiu era beinenqual debatta calirada ell’aria consumada dil pub, cul consum dad entgins Guinness da pum. Senza resultat. E tgi decida alla fin ell’Irlanda? La Baselgia. En quei cass cheu ha la baselgia catolica giu il davos plaid: La famiglia protestanta hagi da bardigliar ils letgs e da durmir da l’autra vart dil cunfin.

Amen.

Amendment.

The first amendment. Igl emprem artechel supplementar tier la Constituziun dils Stadis Uni. Quel prescriva denter auter ch’il Congress american astgi buca far leschas che restrenschien la libertad dalla religiun. Quei congress che vess da pagar milliardas pil mir che Donald Trump vul baghegiar sil cunfin cul Mexico. A Texas el marcau da Mission (quei liug ha propi num aschia) dat ei cartents catolics che san buca pli ir a messa sch’il mir vegn baghegiaus, perquei che lur caplutta fuss lu gest serrada en denter il mir e la lingia dil cunfin cul Mexico.

Fuss forsa tuttina stau meglier da restar gigins che da vegnir tut stuorns per posta da spir mir. Ussa ch’ins sa ch’ils Mexicans vulan propi buca pagar il mir ei il barbagat il pir.

Ei drova nas fins, per far buns cunfins. Cun fins mirins.

Sche Ti sefas en.

Asen.

L’autur è redactur dad SRF