Cantio Antiqua i’l Va Bene a Cuira

(cp) Chi chi nu voul manchanter il Cantio Antiqua in venderdi, ils 5 avrigl i’l Va Bene a Cuira, stuvess reserver ad ura sia plazza. L’ensemble vocal da Samedan as preschainta be d’inrer illa chapitela grischuna. In quellas occasiuns sun ils concerts pel solit vendieus our e vaun a fin cun ün lung applaus. La qualited musicala dal cor es grandiusa: per la CD «Brama» cullas pü bellas chanzuns engiadinaisas ho il Cantio Antiqua survgnieu l’an 2008 il premi annuel da Radiotelevisiun Svizra Rumantscha (RTR). Peter Rechsteiner maina l’ensemble daspö 27 ans cun granda paschiun. El vain assistieu da sia sour Emilia Zangger. Scu oters commembers fo ella part al cor daspö la fundaziun l’an 1977.

Ün giodimaint acustic speciel saregia quella saira la renumneda flötista a traviers Cristina Vital da Cuira. Ella es bain cuntschainta illa scena da musica classica. Pünavaunt paun ils giasts s’allegrer sün highlights culinarics. Il schef da chadafö dal Va Bene Jürg Stauffer, as ho lascho inspirer da chanzuns rumauntschas ed ho creo ün menü da quatter trats cun accents engiadinais. Mincha trat vain accumpagno da vins squisits, tschernieus dal murütscher Hans Rhyner.

L’occurrenza cumainza a las 19.00. Üna reservaziun es obligatorica.