In pau damain visitaders

DA GION NUTEGN STGIER/ANR

Ier ha la Higa serrà las sias portas suenter nov dis. L’exposiziun che ha gì lieu per la segunda giada a la fin da mars ha danovamain sveglià l’interess da vegl e giuven. Marco Engel, il directur da la Higa ha fatg ina bilantscha positiva da l’exposiziun ch’è ida a fin ier a Cuira. Cun esser adina aura da bellezza hajan bain intgins renunzià dad ir a l’exposiziun, persuenter fatg insatge auter sco ir cun skis, in’excursiun da primavaira ubain simplamain giudì il sulegl e las temperaturas agreablas, ha ditg Engel. El discurra da 5% damain visitaders en cumparaziun cun la Higa 2018. Anc sajan las cifras exactas betg enconuschentas, dentant 35 000 visitaders sco ils davos onns haja la Higa segir betg gì. In fatg plaschaivel saja che las exposiziuns spezialas hajan gì in fitg bun resun. Il star da la Higa da quest onn saja senza dubi lura stà il bov Elvis da Giatgen Arpagaus da Savognin.

Pagina 8