Marca nova pil «Schneehüenerstock»

(anr/abc) A caschun dalla radunonza generala ha l’Arena da skis Andermatt-Sedrun publicau ina concurrenza speciala per la fin dalla stagiun. Samih Sawiris drova in niev num che remplazza quel dil «Schneehüenerstock». Ei va encunter Pastgas e la secunda stagiun ella Skiarena Andermatt-Sedrun finescha. Igl ei stau in ordvart bien unviern e Samih Sawiris po esser statisfatgs. La teleferica nova naven dil Cuolm d’Ursera sil Schneehüenerstock ei stau il punct culminont dils davos onns. Cun quella gondla e la staziun da muntogna lunsch sur il pass Alpsu ha Sawiris saviu realisar la colligiaziun Ursera–Tujetsch. In siemi ei ius en vigur era per Silvio Schmid. Ussa ch’el savess guder ils fretgs da tuttas stentas, eis el sedecidius da far in pass anavos ed ir ella secunda retscha.

Per ina identificaziun clara

Cul num Skiarena dat ei savens scumbegls. Era quest unviern seigi quei puspei semussau, han ins udiu alla radunonza generala. Ins constatescha che l’Arena Alva giudem la Surselva profitescha dalla nova Arena denter Sedrun ed Andermatt. La malcapientscha meina hosps potents numnadamein el falliu territori. Asiats che reserveschan online s’informeschan gl’emprem tenor il num «Skiarena». Cheu ha la Arena da skis da Reto Gurtner gl’avantatg avon quella da Sawiris. Buca da far curvien che l’Arena da Gurtner ha registrau quest unviern puspei varga in milliun skiunzs. Biars turists fussen i en tschella arena – sch’ei havess buca dau scumbegls pervia dil num.

L’acziun da «Rebranding» ei urgenta. La noziun «Skiarena» seigi memia banala, generala, han ils turistichers dad Andermatt-Sedrun concediu tschella sera. Els vulan buca pli ditg piarder hosps a favur da Gurtner. Sawiris vul sligiar il problem cul num. Egl avegnir duei la Skiarena dretg e seniester dil Pass dall’Alpsu survegnir ina identificaziun clara ed indubitabla. Atgnamein havess Sawiris saviu ponderar il problem pervia dil num gia cu el ha instradau la colligiaziun Andermatt-Sedrun. Ils implonts han denton giu prioritad. Era eis ei buca schi sempel da crear in niev logo. In «Rebranding» drova ponderaziuns extendidas e profundas enconuschientschas dalla fiera turistica. En quella situaziun drova ei gl’emprem ina analisa dalla situaziun. Per anflar in niev num drova ei ina strategia, in concept. Gl’emprem pass ei staus surprendents: Schmid ha cussegliau a Sawiris d’includer ils survetschs dil pievel romontsch. Ils nums romontschs seigien per el sco groma e mèl, conceda Sawiris. Igl ei in factur pil success dil «Rebranding».

Crap Sogn Gion, igl exempel

Ils buns contacts culs fideivels schurnalists romontschs – tals han accumpignau ils davos onns cuntinuadamein la fasa da baghegiar dalla Skiarena – ein ussa nizeivels. Sawiris scriva all’anr ch’el vegli anflar il niev num en collaboraziun cun lecturas e lecturs dalla Quotidiana. Inclus ell’acziun ein secapescha era abonnents dalla «Tuatschina». En sia brev renda il milliardari egipzian attent ch’el enqueri in num che hagi connex cul coc, respectiv il cor dalla Skiarena Andermatt-Sedrun. Igl ei il péz marcant enamiez il territori da skis colligiau. Il Schneehüenerstock ei sil cunfin denter Uri e Grischun, sin exact 2600 m.s.m. Ils Chines, insumma tut ils turists, sappien buca pronunziar quei num. Ei drova ina noziun romontscha, motivescha Sawiris e pren gl’exempel dil Crap Sogn Gion. Avon varga 50 onns ha Walter Gurtner creau cun quel ina marca. Naven da 1969 ei il num romontsch daventaus ina «brand», in simbol, ina marca enconuschenta sigl entir mund. «Mount St. John» ni «Johannsstein» havessen mai giu tala calamita.

Sawiris ha dumandau l’anr da rimnar las propostas che lecturas e lecturs da La Quotidiana e dalla «Tuatschina» san inoltrar exclusivamein pil «Rebranding» dalla Skiarena Andermatt-Sedrun. Ei dat ina unica cundiziun per la participaziun: Il num sto haver connex cul Schneehüenerstock ni cugl Ungührstöckli ella vischinonza.

Ungühr ni Schneehüener – quels dus nums fan pilver negina queida da visitar in territori da skis. L’anr ha surpriu la coordinaziun dil «Rebranding». Nus supplichein lecturas e lecturs d’inoltrar lur propostas. La marca nova vulan ins introducir sil’entschatta dalla stagiun da stad 2019. Bia temps resta buca. La persuna che ha inoltrau il num che Sawiris elegia, gudogna in premi special. A quella regala el in abonnament general per veta duronta, annunzia il magnat.

Igl ei urgent e fa prescha. Propostas pil num san vegnir inoltradas tochen damaun allas 12.00, cun mail alla redacziun centrala dall’anr: anr@spin.ch ni augustin.beeli@kns.ch