Casti: Auto collidà cun mir e lura 
vegnì giud via

La dumengia saira è in giuven automobilist collidà sin la via datiers da Casti cun in mir e lura vegnì giu da via. In’ambulanza ha transportà l’um da 20 onns en l’ospital a Tusaun. Sco quai che la polizia communitgescha era l’um sin viadi da Lantsch en direcziun Casti. En in caraun a sanestra è el collidà cun il mir. L’auto è cupi-tgà duas giadas, glischnà sur la via ora e lura sa tschentà sin rodas. L’auto ha in donn total.

Al Piz Grialetsch è ina dunna che ha fatg ina tura da skis cun ina gruppa sa glischnada e crudada sur in precipizi giuadora. La dunna da 69 è blessada mez grev ed è vegnida sgulada en l’ospital chantunal a Cuira. Sco quai che la polizia communitgescha, era la dunna ensemen cun quatter autras persunas sin ina tura da skis. Senza skis han trais persunas vulì ascender il piz. Latiers è la dunna glischnada or e crudada radund 100 meters d’ina spunda giuador.

Il Fond monetar internaziunal IWF lauda per gronda part la Svizra en ses examen annual dals pajais. Bunas notas datti surtut quai che pertutga il progress per stabilisar il sectur da finanzas. Ristgas vesan ils experts però sin il martgà d’immobiglias. Bunas notas datti surtut quai che pertutga il progress per stabilisar il sectur da finanzas. Sco gia l’onn avant cusseglia l’IWF però a la Svizra d’augmentar las expensas dal stadi. Uschia pudess er vegnir distgargià la politica monetara. Il surpli dal stai duai vegnir investì e betg servir per sbassar ta-glias. L’administraziun federala da finanzas na va però betg d’accord cun quest punct. Las expensas per la furmaziun per exempel sajan creschidas mintg’onn per 2,5%, quellas per vias per 3% e las investiziuns en la viafier per 2,5%. Quai haja gì in effect da stabilisaziun.