Las professiuns dalla Distec SA

(anr/hh) Era uonn organisescha la Distec SA a Mustér ina presentaziun da professiuns. Giuvenils ch’ein avon l’elecziun dalla clamada e geniturs ein envidai a quella. La revista ha liug mesjamna, ils 10 d’avrel 2019 allas 16.00. Sco quei che l’interpresa industriala a Mustér scriva en ina communicaziun als mieds da massa, vegnan las professiuns che san vegnir emprendidas el menaschi, mussadas. Ei setracta da polimecanists e mecanists da producziun. Medemamein san ils interessents prender envesta dall’interpresa sco tala e dallas partiziuns dils emprendists. D’interess special astgess la presentaziun dil grond e modern parc da maschinas esser. Giuvenils e lur geniturs obtegnan aschia in’informaziun ord emprem maun, buc il davos era perquei che emprendists en scolaziun muossan sezs tgei lavurs ch’els fan. Medemamein vegnan referents externs a presentar detagls dils emprendissadis e dallas pusseivladads da perfecziun suenter quels.

La Distec SA a Mustér ei in menaschi che lavura cun aulta qualitad e precisiun. La paletta sil sectur dall’elavuraziun da metal ei fetg gronda. Leutier s’auda era la montascha da gruppas da construcziun e la producziun da cumponentas, la producziun da tocca resgiada cun CNC sco era la producziun da prototips e serias pintgas. Sper la lavur cun materia usitada sco itschal ed alumini, elavurescha la Distec SA era material d’aulta qualitad sco invar e titan. Per l’elavuraziun da quels materials stat in parc da maschinas modern e precis a disposiziun.

La Distec SA gauda in excellent num internaziunal per siu ault standard da qualitad. Ses products sil sectur dall’industria da space ed aviatica, tecnica da labor e da medischina, optica, sensorica, industria d’IT, construcziun da maschinas ed apparats en general e fuormas ein bein enconuschents.