Cun la Scola Vinavon a Cambridge

(cp) Duront il zercladur 2019 visetan las scolaras ed ils scolars dalla formaziun transitorica Vinavon dil Center da formaziun Surselva a Glion la scola da lungatg Studio School a Cambridge. Circa la mesadad da nossas scolaras e nos scolars separticipeschan a quella scolaziun. Suenter che varga 85% han gia ussa anflau in emprendissadi e plinavon cuntonschiu certificats d’informatica (certificat d’informatica svizzer e la licenzia European Computer Driving), ils diploms da lungatg (PET e FIRST) ed ein plinavon sepreparai intensivamein per las pretensiuns dalla scola professiunala, munta quella dimora egl exteriur il punct culminont digl onn da scola. Las preparaziuns leutier progredeschan cun tuttas forzas.

Dapi igl onn 2002 porscha la Scola Vinavon a lur scolaras e scolars la pusseivladad d’emprender engles a Cambridge. Leutier vegnan els accumpignai e susteni da persunas d’instrucziun dalla Scola Vinavon sco era da collaboraturs e collaboraturas dalla Studio School ch’exista gia dapi igl onn 1954. Duront 28 lecziuns per jamna cumpleteschan e consilideschan nossas scolaras e nos scolars lur engles. Fetg impurtont ei en quei connex era il brat da cultura.

El marcau historic da Cambridge vegnan mintg’onn rodund 20 000 studentas e students digl entir mund instrui, e quei en differentas scolas ed universitads. Duront il zercladur emprendan rodund 400 scolaras e scolars alla Studio School of Cambridge en otg differents nivos da prestaziun. La gronda part dad els deriva dall’Asia, digl Orient Central, dalla Spagna, dalla Frontscha, dalla Hollanda e naturalmein dil Grischun. Duront la dimora vegnan era differentas occurrenzas culturalas purschidas allas scolaras ed als scolars.

Leudenter s’audan visetas a musicals el renomau Londoner West End, sco per exempel «Lion King», «Aladdin», «Mamma Mia», «Phantom of the Opera», «Matilda» ni «School of Rock». Ulteriuras excursiuns culturalas meinan en impurtonts loghens sco Oxford, Stonehenge, Bath ni York. Fetg special ed interessant per nossas scolaras e nos scolars vegn era il habitar ella famiglia hospitonta ad esser. Els emprendan cheutras da sedepurtar sco hosps.

Il pli fetg selegran las scolaras ed ils scolars denton d’emprender d’enconuscher nova glieud, da vegnir pli independents e da viver en in niev contuorn jester. Ei regia denton era in cert respect, damai ch’els san buca tgei che spetga tut els. Adina cu ins entaupa scolaras ni scolars d’antruras audan ins dallas grondiusas experientschas ch’els han astgau far a Cambridge e ch’els frequentassien immediatamein puspei nossa Scola Vinavon a Glion. Nus essan perschuadi che nus purschin cun nossa formaziun transitorica Vinavon in fetg bien onn da passerella denter scola e clamada.

Per plascher visitei nus era sut: bzs-surselva.ch/scola-preprofessiunala ni sin facebook.com/brucken angebote vinavon. La proxima sera d’informaziun ha liug mesjamna, ils 8 da matg 2019 naven dallas 17.00 en nossa Casa Vinavon a Glion.