Iniziativa: Ils pli ritgs duain pajar dapli taglia

Las persunas las pli ritgas en Svizra duain pajar dapli taglia. Quai pretendan ils Giuvens socialists cun lur iniziativa da 99% ch’els han inoltrà. Tut en tut èsi ve-gnì rimnà 134 000 suttascripziuns. Concret duain entradas da chapital sco tschains e dividendas vegnir suttamessas 1,5 giadas dapli a la taglia ch’entradas da lavur. Las entradas supplementaras duain vegnir impundidas per sbassar la taglia a favur d’entradas medias e bassas u per prestaziuns socialas sco canortas d’uffants, reducziun da premias u per la furmaziun. Il 2017 è la facultad da las 300 persunas las pli ritgas en Svizra creschida per 60 milliardas francs. Quai che correspundia a prest il budget da la Confederaziun per in onn, uschia ils Giuvens socialists. Ensemen possedian ils pli ritgs passa 670 milliardas francs.

La Federaziun dals pestgaders è schoccada dals pesticids che l’institut da perscrutaziun Eawag ha chattà durant il 2017 en auas currentas en Svizra. Il studi dal Eawag mussa ch’auals pitschens en regiuns nizzegiadas intensivamain da l’agricultura sajan contaminads cun pesticids. Dad ina vart decimeschian ils pesticids la maglia dals peschs, da l’autra vart tissientia ella ils animals. Per meglierar la situaziun dovria in’entira retscha da mesiras per exempel da remplazzar substanzas dubiusas e da reducir il diever da pesticids. Era las organisaziun per la protecziun da l’ambient Greenpeace, BirdLife, WWF e Pro Natura sa drizzan cun in appel a la politica.