La musa en Scolaviva

(anr/abc) Il fevrer ha la Scolaviva da Laax entschiet in project dalla musa culs artists Luis Coray ed Yvonne Gienal. L’em-prema fasa ei stada il fevrer avon las vacanzas da sport. L’jamna vargada e questa cuntinueschan las lavurs dil project «musica romontscha.art.affons». Gl’entir menaschi dalla Scolaviva, naven dalla scoletta tochen tier la tiarza superiura, ei cumpigliaus. Mintga classa ha astgau eleger ina canzun romontscha. Cun quella s’identifichescha ella, ils affons dattan expressiun a quella fuorma digl art, e quei cun in’autra fuorma, igl art figurativ. Tenor il tetel ch’ils menturs ed artists Yvonne Gienal e Luis Coray han elegiu pil project, plidenta quel la musa, mo era il lungatg romontsch ei el center. Ils affons gaudan la variaziun enteifer il program d’instrucziun digl onn da scola. Ina dallas finamiras eis ei da sepreparar per ina fiasta digl art culla vernissascha dall’exposiziun dils affons. Quell’occurrenza publica ei previda ils 10 da matg 2019 e duei esser ina gronda manifestaziun tiel motto «musica romontscha.art.affons». Denter auter han las classas elegiu canzuns da Tumasch Dolf e Gion Balzer Casanova, lu talas da Pascal Gamboni e Mattiu Defuns.

Pagina 3