Gie all’Infra Mundaun SA

(anr/hh) Cun 135 encunter 50 vuschs ha la radunonza communala da Sursaissa Mundaun acceptau il venderdis sera la fundaziun dall’Infra Mundaun SA. La societad duei vegnir fundada communablamein cun la vischnaunca da Lumnezia e las Pendicularas Sursaissa Mundaun. La participaziun dalla vischnaunca da Sursaissa Mundaun ei cumbinada cun cuosts da 160 000 francs. Alla radunonza communala ch’ha giu liug ella halla plurivalenta a Cuort han vischinas e vischins era concediu in credit da 293 000 francs per la construcziun dalla via da quatier Canetg a Surcuolm.

Infra Mundaun SA

Avon struschamein in onn ha la radunonza communala da Sursaissa Mundaun giu returnau alla suprastonza communala il project per la societad d’infrastructura. Essend che la suprastonza communala ei stada dil meini ch’in societad communabla cun la vischnaunca da Lumnezia e las Pendicularas Sursaissa Mundaun seigi necessaria ei il project ussa vegnius danovamein sin tapeta. La vischnaunca da Lumnezia sco era las Pendicularas Sursaissa Mundaun havevan gia approbau la fundaziun. Aunc ina ga ein las finamiras da quella societad communabla vegnidas dilucidadas: Cuntinuar cun las ideas da project actualas per la stad ed igl unviern e concretisar la planisaziun da projects; scaffir in’obligaziun vicendeivla denter ils treis partenaris, enteifer ina societad communabla; clara repartiziun dallas rollas ed incumbensas. La societad communabla Infra Mundaun SA surpren l’incarica dallas duas vischnauncas e dallas pendicularas d’elavurar la basa per planisaziuns concretas da projects. Empremas retschercas pils objects novs duein vegnir fatgas gia questa primavera entras igl accumpignader d’ambient.

Planisar e construir

La societad nova ha igl intent concret da planisar, construir e finanziar la basa necessaria – denter auter pil slargiament – per pistas, indrezs d’ennevar sco era per las purschidas da stad e d’aventuras el territori da Sursaissa Mundaun Lumnezia. En special sa la societad acquistar, baghegiar ora e construir da niev tals indrezs sco era fittar per cundiziuns favoreivlas e che cuarclan ils cuosts da furniturs da prestaziuns directs. Per avantatg d’in svilup persistent dalla regiun turistica Sursaissa Mundaun Lumnezia ei la finamira da gudogn denton negina finamira dalla societad. Grazia ad ina societad communabla sa il svilup succeder en ina fuorma coordinada. Aschia sa vegnir segirau ch’il hosp sa far diever ella regiun entuorn il Mundaun d’ina purschida vasta ed intercommunala. Cun l’Infra Mundaun SA retscheiva la Surselva Turissem SA in impurtont partenari che sviluppescha nova infrastructura da turissem. La Surselva Turissem SA da sia vart sa activar nova purschida e commercialisar quella.