«La multifariadad da 
las aventuras musicalas»

DA GION NUTEGN STGIER / ANR

En bun dus mais vegnan 2000 musicantas e musicants a sa preschentar als experts tar la Festa da musica chantunala ad Arosa. L’occurrenza cuzza trais dis e da la partida èn 54 societads da musica. In fatg plaschaivel è che da quellas derivan 42 dal Grischun. Sonda ha l’Uniun chantunala da musica dal Grischun salvà sia radunanza da delegads a Silvaplauna. Per l’organisaziun è stada responsabla la Societad da musica Silvaplauna. Ella ha er gist dà a l’occurrenza la noda musicala e quai sut la direcziun da Curdin Caviezel. Beneventads èn ils 100 delegads e numerus giasts er vegnids da Daniel Bosshard, il president da la vischnanca Silvaplauna. El ha ditg che mintga lieu haja da tgirar la cultura locala, ella che saja in grond stgazi. Tar quel tutga er mintga furmaziun da musica.

Far musica è bun per 
la fidanza en sai

Dapi il 2015 è Andy Kollegger president da l’Uniun chantunala da musica dal Grischun. El è in president che viva bunamain mintga di per l’uniun ed er per la musica. Ad el è la musica vegnida messa en tgina e sch’el discurra da musica targlischan ses egls. Far musica saja fitg bun per la fidanza en sai, ella promovia er la creativitad e saja da gronda valur per il svilup da mintgin. Ultra da quai saja far musica bain er in art pli aut, ha ditg Kollegger. Dal reminent è il Surmiran er commember da la direcziun da l’Uniun da musica svizra.

Musica tutga 
tar mintgin

Cun plaschair saja el vegnì a Silvaplauna, ha ditg Jon Domenic Parolini, il president da la regenza e schef dal departament d’educaziun e da cultura. En sia vita tutga la musica il cor da mintgin. Quai sappia esser cun far musica, cun tedlar musica ubain cun giudair la musica, ha menziunà il cusseglier guvernativ. La musica saja er in dals maletgs da nossa gronda varietad e quai da mintga vischnanca, regiun e dal chantun. Musica saja viver e sa sentir, ha punctuà Parolini. La musica saja lura er la multifariadad da las aventuras musicalas. El ha er confermà ch’il chantun sustegnia er en l’avegnir la promoziun da la musica, la promoziun dals giuvenils musicants che saja en il Grischun exemplarica.

I fà strusch senn

Dals 21 fin als 23 da zercladur 2019 stat Arosa per trais dis en il center da la musica. Lura è il lieu dal Scanvetg responsabel per l’organisaziun da la Festa da musica chantunala. Da la partida vegnan ad esser 54 societads da musica. Da quellas derivan 42 dal Grischun. En cumparaziun cun la davosa Festa da musica chantunala ch’è stada il 2013 a Cuira en quai trais musicas grischunas damain. Kollegger ha ditg che l’intent da l’Uniun chantunala da musica dal Grischun saja stà d’organisar in’occurrenza per musicas dal chantun e da dar a quellas la pussaivladad da sa participar a la festa. Avant sis onns a Cuira sajan bain stadas da la partida 75 furmaziuns da musica, da quellas lura passa 30 d’ordvart il Grischun. Kollegger ha ditg che provisoricamain avevian s’annunziadas 64 musicas grischunas per Arosa ed a la fin da la partida sajan 42 societads da musica. I fetschia strusch senn da laschar far en l’avegnir las musicas annunzias provisoricas, ha menziunà il president.

Zernez 2020

Cun Adrian Willi ha l’Uniun chantunala da musica dal Grischun chattà ina persuna fitg activa per promover la musica da giuvenils. El è ils davos mais stà pulit engaschà er cun ir a la tschertga d’in lieu che segna per l’organisaziun da la proxima Festa da musica da giuvenils chantunala. La davosa è stada il 2016 a Lai e sche tut va tenor plan duai la proxima avair lieu il 2020 a Zernez. Decidì han ils delegads che tar las occurrenzas chantunalas dals musicants giuvenils dastgan be trais musicants sur 25 onns far part da la furmaziun da musica da giuvenils. Ultra da quai dastga ina societad da musica er sunar tocs d’ina categoria pli auta ubain pli bassa tar la Festa da musica da giuvenils chantunala. Cun Yvonne Rauch retschaiva l’Associaziun grischuna da musica ina nova secretaria, ella che remplazza Ladina Gisep che sa retira be suenter dus onns da quel post e quai or da raschuns professiunalas.