L’on da giubileum es i a fin a Scuol

(anr/afi) L’Associaziun svizra d’hoteliers restaurateurs diplomats ha elet ün nouv commember illa suprastanza. Ils respunsabels han preschantà ün nouv cudesch pel marketing in l’hotellaria. L’Associaziun svizra d’hoteliers restaurateurs diplomats (AHD) ha invidà in lündeschdi a seis commembers a la 50avla radunanza annuala. Rivats sun els da tuot la Svizra a Scuol pro l’hotelier da l’on Kurt Baumgartner. Sco üsità ha gnü lö ün program accumpagnativ cun tanter oter üna visita i’l Chastè da Tarasp. Davo la radunanza cullas tractandas statuarias e referats es gnü preschantà il nouv cudesch «Strategisches Marketing in der Hotellerie» da Michael Betz e Philine Betz-Werner.

Ün on cun bleras activitats

L’on passà ha festagià l’AHD seis 50avel giubileum e quai cun divers arrandschamaints e festas per las commembras e’ls commembers. L’organisaziun cun sez a Berna es gnüda fundada da l’on 1968, davo chi vaiva gnü lö il prüm ciclus da perfecziunamaint per impressaris da la Società svizra d’hoteliers. Michael M. Müller, il president da l’AHD, ha pudü bivgnantar a passa 60 commembers a la radunanza chi d’eira al medem mumaint la finischiun da las activitats festivas da l’on da giubileum. «L’on 2018 d’eira ün on interessant cun blers ed impreschiunants arrandschamaints», ha manzunà il president. Tanter oter han pudü las studentas e’ls students dal 44avel ciclus da perfecziunamaint tour in consegn lur diplom. «Avant trais eivnas vaina pudü tour in funcziun nossa nouva pagina d’internet», uschè Müller. L’AHD es preschainta eir sün ulteriuras plattafuormas socialas. «Quist on d’eira noss’associaziun la prüma vouta da la partida sco partenaria per l’elecziun da l’hotelier da l’on.» La radunanza annuala da l’AHD ha decis d’ingrondir lur suprastanza. Murat Baki da Langenthal es gnü elet sco nouv commember illa suprastanza.

Publicaziun da lavurs da diplom

Ün dals intents da l’AHD es da promouver il «networking», la scolaziun e l’amicizcha tanter las anteriuras absolventas ed absolvents dals ciclus da perfecziunamaint per impressaris da la Società svizra d’hoteliers. Important es eir la promoziun da la generaziun giuvna e da tils sustgnair sülla via per dvantar persunas da cader. La Fundaziun Hans Schellenberg publichescha adüna darcheu lavurs da diplom chi sun importantas per la branscha da l’hotellaria. «A la fin da mincha ciclus scrivan las studentas e’ls students üna lavur da diplom», ha dit Herbert Messerli, commember da la fundaziun. Tenor el nu stess gnir publichada be la megldra lavur da diplom, «in ün o l’oter möd stessan esser publicas tuot quistas lavurs.» Uschè s’haja s-chaffi la pussibiltà per las commembras e’ls commembers da l’AHD da tillas leger sülla pagina d’internet da l’associaziun. «Per gronda part as tratta da lavurs fich interessantas ed impreschiunantas», ha conclüs Messerli.

Proget cumünaivel

Il cudesch «Strategisches Marketing in der Hotellerie» es ün proget cumünaivel tanter l’AHD e l’Institut per marketing da l’Università San Galla. Resultà es ün cudesch chi cumbina il savair teoretic culla pratica dal minchadi illa hotellaria. Il cudesch serva sco manual per la direcziun o per las persunas respunsablas pel marketing d’ün hotel. Cun l’agüd dal manual esa pussibel da sviluppar ün plan da marketing professiunal. Plünavant as poja til ütilisar eir illa scolaziun e perfecziunamaint da perits da l’hotellaria. Il cudesch cuntegna duos parts. Illa prüma part vegnan tematisats tuot ils process bsögnaivels dal marketing. Tanter oter vegna muossà co chi’s survain las infuormaziuns dal marchà e seis giasts, co chi’s posiziunescha ün hotel, co chi’s sviluppa nouvas sportas per l’hotel o co chi’s maina cun success inavant la marca da l’hotel. Illustraziuns concretas chi derivan da la pratica muossan co cha’ls concepts e’ls tools pon gnir ütilisats i’l minchadi. Plünavant stan a dispoiziun a la fin da mincha chapitel glistas da controlla. Illa seguonda part dal cudesch vegnan preschantadas 14 gestiuns d’hotels, uschenomnats «Best-Practice». Quistas gestiuns dan ün’invista co chi’s po realisar cun success las differentas disciplinas dal marketing, quai independentamaing da la categoria da l’hotel.