Per plontas e per selvaschina

dad augustin beeli / anr

Ier han ils dus uffecis cantunals cumpetents presentau il rapport dalla Surselva che tracta la situaziun digl uaul sco spazi economic e habitadi dalla selvaschina. Igl ei igl emprem da siat rapports digl entir Grischun. Igl uaul grischun ha ina funcziun decisiva per la populaziun. El ei buca mo spazi da recreaziun e spazi da viver. El schurmegia era da bovas e lavinas. Igl uffeci d’uaul e prighels dalla natira sto tgirar las surfatschas e tener igl equiliber denter uaul giuven ed uaul vegl. Regiuvinar surfatschas ei denton buca sempel en vesta alla carschen dalla populaziun da selvaschina, cunzun dallas tscharvas. Per saver agir e prender las mesiras drova ei in’expertisa dalla situaziun. Quei fa il cantun periodicamein cul schinumnau «rapport d’uaul e selvaschina» ch’ils organs forestals e dalla catscha fan mintga 15 onns. Ier ha igl uffeci d’uaul e prighels dalla natira, en buna collaboraziun cugl uffeci da catscha e pesca, presentau quei instrument dalla planisaziun. Il rapport ch’ils dus uffecis han presentau ier a Glion ei igl emprem ch’ei dat en siat regiuns dil Grischun tochen il 2024. Finamira eis ei da minimar ils donns che la selvaschina fa els uauls da schurmetg. Dapi il davos rapport ein ils donns sereduci levamein da 15 sin 12 pertschien. Ils organs d’uaul e da catscha han puntuau ch’ins sappi prender mesiras mo cun ina buna concordanza denter ils dus uffecis.

Pagina 3