Augmentau la sviulta per 87 pertschien

(anr/hh) Grazia ad augments sin tuts secturs ei la sviulta totala dall’Andermatt Swiss Alps SA (ASA) carschida igl onn vargau per 87 pertschien sin 135,7 milliuns francs. Cun 110,2 milliuns francs ha la vendita d’immobilias contonschiu in niev record. Il hotel The Chedi ha saviu augmentar la sviulta per 17 pertschien sin 26,2 milliuns francs e la sviulta dall’Arena da skis Andermatt-Sedrun ei carschida per 69 pertschien. Igl onn 2018 ei l’infrastructura dall’Andermatt Swiss Alps SA carschida vinavon. Aschia ha l’interpresa aviert il hotel Radisson Blu cun 179 combras, la residenza Gotthard cun 110 habitaziuns sco era la casa d’appartaments Alpenrose. Entuorn la Piazza Gottardo ein baghetgs per stizuns, restaurants ed il bogn cuvretg vegni erigi. Sco quei che l’ASA ha communicau ier ei la vendita d’immobilias carschida sil nivel da record da 110,2 milliuns francs. Sco quei ch’ins constatescha ei la damonda per immobilias carschida la fin digl onn. Quei attribuescha l’interpresa denter auter alla colligiaziun dil territori da skis ch’ha saviu vegnir terminada. Mo lu era hotels ed habitaziuns modernas e la purschida da golf, wellness e shopping. Entochen la fin digl onn eran 80 pertschien dallas habitaziuns construidas vendidas. Las habitaziuns en affittaziun ein stadas occupadas duront igl entir onn ora ella media per 53 pertschien.

Deficit budgetau

Igl onn da fatschenta 2018 ha l’ASA contonschiu ina sviulta da 135,7 milliuns francs. Quei ei bunamein il dubel digl onn avon. Il quen siara cun in deficit budgetau da 40,7 milliuns francs, igl onn avon 29,8 milliuns francs. Quella sperdita attribuescha l’interpresa als cuosts da fabricaziun e las amortisaziuns. Entochen la fin digl onn ei vegniu investau en tut 1,05 milliardas francs. Grondas investiziuns ein danovamein vegnidas fatgas el territori da skis. Tut en tut ei vegniu investau entochen ussa 140 milliuns francs en quel e quei enteifer in temps fetg cuort. L’ASA cun ses menaschis d’hotellaria e l’Arena da skis Andermatt-Sedrun occupava la fin digl onn passau varga 900 persunas. Procentualmein plaidan ins da 817 plazzas cumpleinas.

Bien svilup dil The Chedi

Il hotel The Chedi ch’ei staus aviarts 11 meins ha giu in’occupaziun da 54 pertschien. La sviulta ei carschida per 17 pertschien sin 26,2 milliuns francs. Il diember da hosps ei s’augmentaus per 11 pertschien sin strusch 43 000. Cun l’avertura dil hotel Radisson Blu la fin 2018 ha il diember necessari da letgs saviu vegnir augmentaus. El dispona da 179 combras e 110 suitas. In unviern positiv ha era l’Arena da skis Andermatt-Sedrun giu. Digl emprem october 2018 entochen ils 31 da mars 2019 ei la sviulta carschida per 69 pertschien. Il diember da prementradas ei carschius per 36 pertschien sin 450 000. Cul concept da prezi dinamic ei vegniu cuntinuau igl unviern vargau. La cumpart dalla vendita online ei vegnida augmentada per 16 pertschien. Il prezi da 10 francs pil di da fuffergnadi la mesjamna ei staus in success cumplein. Da dis da bialaura eran entochen 12 000 pesunas el territori. Naven dad immediat ei era la colligiaziun cun pendiculara da Sedrun el territori da skis da Mustér aviarta.