Ils Cugns vegn el center

dad augustin beeli / anr

Dapi 20 onns ei la pendiculara da Cassons ina tematica a Flem. Daferton ei quella allontanada ed ils da Flem discuteschan co e cun tgei remplazzar ella. La votaziun dils 19 da matg ei decisiva. «Vus haveis mo duas pusseivladads, in gie ni in na. Vus persuls haveis enta maun ei», ha Reto Gurtner repetiu pliras gadas. Gliendisgis sera alla radunonza communala ha la suprastonza communala tractandau il messadi dalla proxima votaziun all’urna. Ei va per in credit da 20 milliuns francs per baghegiar la nova pendiculara che duei colligiar Flem cull’Arena tectonica Sardona. Suenter che l’Arena Alva SA sco proprietaria digl implont ha spazzau la pendiculara Naraus–Cassons spetga Flem sin ina nova avertura. Previu eis ei da fundar la societad Cassons SA cun participaziun eguala denter Arena Alva e vischnaunca da Flem. Mintgina duei esser participada cun 45 pertschien, tiarzas persunas – privats ni societads – partessen il rest da 10 pertschien. Il project da baghegiar ei plafonaus cun 80 milliuns francs. Ils responsabels da vischnaunca ed Arena Alva ein perschuadi ch’igl ei in project turistic exemplaric, naschius ord las experientschas dils onns vargai. Buca pli Cassons vegn ad esser el center, mobein in punct datier dil Crap la Tgina, in liug marcant denter Crap da Flem, Plaun dil Segnas ed il territori dall’Alp Nagens.

Pagina 3