Sessiun dils giuvenils 2019

La sessiun dils giuvenils dalla fin d’jamna vargada ei stada in success. Schegie ch’il diember dils participonts ei staus empau mudests ha quell’occurrenza dau ina buna pusseivladad per discussiuns vivas davart damondas e temas brisants ed actuals. Era jeu hai priu part da quell’occurrenza fetg interessanta.

Buca mo la tematica dil clima ch’ei vegnida tractada ella gruppa «energia ed ambient», mobein era auters secturs ein vegni discussiunai. Denter quels eran ils temas «formaziun e scolaziun» sco era «participaziun dils giuvenils». Jeu hai fatg part dalla secunda gruppa. Ensemen cun treis auters participonts ed il menader da gruppa havein nus elavurau ina petiziun che pertucca l’educaziun da politica en scolas superiuras.

Quei ei ina tematica che fatschenta era la pcd giuvna dil Grischun dapi entgin temps. La proposta inoltrada, la quala ei seresultada ord discussiuns liungas e cunzun fetg interessantas ella gruppa, ei la finfinala vegnida presentada als participonts da tschellas gruppas ella sala dil cussegl grond. La petiziun ei vegnida acceptada e cunquei surdada alla regenza dil cantun Grischun. Quei ha legrau nus zun fetg.

Per mei ei quella sessiun da giuvenils stada ina fetg bun’experientscha per saver dar in sguard davos las culissas ed emprender co la politica el cussegl grond funcziuna. Plinavon hai jeu survegniu in’impressiun co il mintgadi vesa ora el parlament cantunal dil Grischun.

Denton han ins era saviu emprender d’enconuscher entginas autras persunas giuvnas che s’interesseschan medemamein per la politica. Duront las pausas ha ei dau massa discussiuns davart temas actuals.

Quei ei stau fetg enrihent cunzun perquei che numerus meinis da glieud da differentas partidas ein sescuntrai. En quei senn less jeu cussegliar fetg als giuvenils da separticipar alla proxima sessiun, pertgei ins sa nezegiar quell’occasiun per dar impuls ed exprimer ses agens quitaus, mo era sias atgnas ideas e soluziuns.

Sarina Caduff, candidata dalla pcd giuvna dil Grischun per il cussegl naziunal