«Tras Scuol» per ün bun scopo

(anr/sp) La maturanda da Tarasp organisescha i’l rom da sia lavur da matura in gün da quist on üna cuorsa tras Scuol. Il guadogn va a favur da la Fundaziun da cour svizra e dess gnir investi in loipas per paziaints da cour. «L’idea d’organisar üna cuorsa es vairamaing gnüda d’üna conscolara», declera Svenja Ammann da Tarasp. Ella frequainta la scoula chantunala a Cuoira ed ha scuvert avant bundant duos ons sia paschiun pel cuorrer: «Mias prümas cuorsas n’haja fat avant var tschinch ons, ma pür cur ch’eu n’ha cumanzà la scoula oura Cuoira suna dvantada commembra dal BTV Chur Leichtathletik e n’ha cumanzà a trenar plü intensivmaing.» Uossa frequainta la giuvna da 17 ons var quindesch cuorsas d’atletica ligera l’on. Sper il cuorrer es eir il passlung e sport in general üna gronda paschiun dad Ammann. «E cunquai ch’eu sun eir üna persuna chi organisescha gugent es nada l’idea d’organisar svessa üna cuorsa», manzuna Ammann chi s’occupa uossa daspö bundant ün mez on cun sia lavur da matura.

«I nu’s das-cha suotvalütar la lavur»

Fin cha la cuorsa po finalmaing avair lö ils 8 gün 2019 ha Ammann amo blera lavur davant sai. «Pel mumaint es meis focus plainamaing sülla tschercha da sponsuors per cha la cuorsa possa insomma gnir fatta», disch la scolara ed agiundscha cun ün rier: «Eu nu n’ha cret cha l’organisaziun detta talmaing blera lavur e cuosta tant temp e nervas. I’s sto propcha far gugent la lavur.» Ma per Ammann nu vaja pro quist proget be pell’accumplida da sia lavur da matura, ella perseguitescha eir ulteriurs böts: «Eu sper cha tuot ils curriduors hajan plaschair vi da la cuorsa e possan far üna bun’experienza. Implü dess il guadogn net ir a favur da la Fundaziun da cour svizra.»

Il cour tilla sta a cour

La decisiun da sustgnair la fundaziun da cour ha scopos persunals pella scolara. «Meis bazegner e meis barba vaivan tuots duos problems da cour e sun morts fich giuvens.» Pervi da quai dess il guadogn net ir i’l fuond per las uschedittas loipas da cour. «Il special vi da quellas loipas da passlung es tanter oter ch’ellas sun plü planivas e permettan perquai da far passlung a minchün, ma impustüt eir a persunas cun cours plü debels», spiega Ammann. Uschè less ella sustgnair cun agüd da seis proget in plüs möds la prevenziun da malatias da cour perquai cha «far sport güda eir a tgnair fit il cour».

Ün’ulteriura cuorsa 
nun es exclusa

«Svessa fetscha il plü gugent cuorsas tanter tschinch e desch kilometers», spiega la scolara chi piglia regularmaing part a cuorsas in tuot la Svizra. Il traget principal da la cuorsa tras Scuol varà üna lunghezza da set kilometers, tuot tenor pon però eir gnir absolvats tragets plü cuorts. Per uffants daraja üna cuorsa separada. «Eu svessa nu’m poss displaschaivelmaing na participar a mia cuorsa, ma mia sourina sarà da la partida», disch Ammann. Scha tuot gratajia bain es la giuvna eir interessada d’organisar in futur ulteriuras cuorsas d’atletica ligera in Engiadina Bassa: «Lura però forsa na minch’on, ed insembel cun ün comitè d’organisaziun, pervi cha organisar suletta tuot la cuorsa dà bod massa blera 
lavur.»