Pegnas Deplazes Surrein:
Igl arcun da calira

(anr/abc) Otto ed Ignaz Deplazes festiveschan sonda proxima il centenari dall’interpresa Pegnas Deplazes. L’interpresa cun siat emploiai ei enconuschenta lunsch sur ils cunfins dalla Surselva. Tgei ei pli cumadeivel en ina casa ch’ina pegna scalegl? Otto ed Ignaz Deplazes da Surrein s’audan tier la dinastia dils tschentapegnas da Surrein. Las metodas ed il material ein semidai el decuors dils onns. Igl onn 1919, cu lur tat ha fundau la fatschenta, deva ei ina partida cavas da scalegl sin territori dalla vischnaunca da Sumvitg. Otto ed Ignaz festiveschan il giubileum da 100 onns dalla fatschenta. Lur bab Augustin haveva surpriu il menaschi dil tat Giachen. Els onns sissonta ei la stagnaziun vegnida, pertgei en tuttas casas novas installav’ins scaldaments centrals cun ieli. Numerusas pegnas scalegl han ins allontanau e dismess en quels onns. Suenter la crisa digl ieli igl onn 1973 ha ei dau ina pulita viulta. Oz ei il menaschi in da rodund 30 ch’ei dat aunc en Svizra. Pegnas Deplazes elaborescha denter 80 e 100 tonnas scalegl ad onn. Las cavas el contuorn ein deplorablamein explotadas. Ils davos blocs da scalegl ha Otto Deplazes resgiau avon rodund 12 onns a Laus. L’explotaziun faira ed a bunas cundiziuns, vinavon l’excellenta qualitad dil crap san Otto ed Ignaz Deplazes garantir vinavon. Il crap vegn denton neu da surmar.

pagina 5