Il zenn pign ei arrivaus

(anr/abc) Dumengia proxima, la dumengia da palmas, inaugurescha la pleiv catolica da Sagogn il zenn historic da 1768. Quel ei restauraus e vegn puspei tratgs si en clutger. Mesjamna vargada, entuorn las 10.45, han ils habitonts da Sagogn udiu a resunar il tuchiez d’omsiduas baselgias. Igl ei in vegl usit ch’ei tucca d’ensemen sch’in zenn niev arriva el vitg. Il zenn che la firma Rüetschi dad Aarau ha transportau a Sagogn ei denton buca novs. Il zenn porta l’annada 1768 ed il num dalla cularia A. Brandenberger da Zug. La pleiv catolica ha decidiu avon dus onns da schar restaurar quei zenn che fuva fendius. A caschun d’ina dieta dallas cumpignias da mats dalla Foppa igl onn 1961 havevan ins tratg memia vehement la suga dil zenn pign. La malprecauziun ha giu consequenzas, il zenn da 180 kilos ei sefendius ed ins ha stuiu remplazzar el cun in niev zenn da miezgi. Il zenn pign restaurau benedius igl onn 1768 retuorna sil clutger. La pleiv inaugurescha el festivamein dumengia proxima. Suenter la messa da dumengia da palmas vegn sur Alfred Cavelti, canoni extraterritorial ed anteriur decan dalla Surselva, a surdar el a sia funcziun cun ina cuorta ceremonia. El ha dil reminent beneventau mesjamna il zenn cun esser siu padrin, quei ensemen culla madretscha Anna Helena Cavelti. Padrin e madretscha ein colligiai stretg cun quei zenn pign e cul tuchiez. omisdus ein carschi si ella vischinonza dalla baselgia.

Il survetsch divin da dumengia da palmas cull’inauguraziun festiva dil zenn pign ei dumengia suentermiezgi allas 16.00 a Sagogn.