La selvaschina drova 
passadis intacts

(anr/hh) La Pro Natura ei buca cuntenza cun la situaziun dils corridors per la selvaschina en Svizra. Las pusseivladads tecnicas per ina sanaziun fussen avon maun, mo la realisaziun seretarda. La Pro Natura pretenda dalla confederaziun e dils cantuns d’agir ladinamein. Ad ina dieta dalla Pro Natura ch’ha giu liug dacuort ei il stan dils corridors per la selvaschina en Svizra vegnius tematisaus ed en quei connex ei vegniu constatau che la situaziun da quels ei schliata: «Animals selvadis ston saver viagiar, dil liug da ruaus al liug da vivonda e dils refugis da stad tiels refugis d’unviern, per aschia saver occupar loghens novs. Quels passadis vegnan denton restrenschi considerablamein da vias, viafier e surfatschas habitadas.» Mintg’onn mieran rodund 20 000 animals selvadis gronds sin las vias svizras. Alla dieta professiunala davart ils corridors dalla selvaschina ch’ha giu liug dacuort a Berna ei vegniu dau informaziuns actualas davart las pusseivladads limitadas dalla selvaschina da semover d’in liug a 
l’auter.

En favur dalla biodiversitad

Claude Fischer dalla Scol’aulta per cuntrada, tecnica ed architectura (Hepia) ha puntuau l’impurtonza dallas punts per la selvaschina en connex cun la reit dil spazi da viver. Quei seigi decisiv per contonscher las finamiras dalla strategia dalla biodiversitad en Svizra. Adrien Zeender digl Uffeci federal per ambient ha suttastrihau l’impurtonza dils elements empalonts ella cuntrada. Quels surveschien buca mo alla promoziun dallas specias, mobein vegnien era dabien al carstgaun: «Ei dat dameins accidents e la cuntrada ei pli varionta.» Accentuau l’impurtonza dils passadis per la selvaschina ha era Antonio Righetti dils inschigniers e planisaders B+S sco elements d’ina buna reit enteifer la cuntrada cultivada. En quei connex eis el vegnius sustenius dil biolog da selvaschina Stefan Suter da WildLife Solutions: «In passadi per la selvaschina ei lu finius sch’ins sa documentar ch’il basegns dalla selvaschina ei ademplius. Quei ei pusseivel cun controllas.»

Punts ord lenn

Sco quei ch’igl ei vegniu constatau alla dieta a Berna selaian corridors realisar era cun elements da lenn en fuorma da punts. «En cumparegliaziun cun construcziuns da betun ein punts ord lenn construidas pli spert. Ellas prendan denton era risguard dallas resursas ed ein persistentas», di Lukas Rüegsegger dall’interpresa Timbatec. «Punts ord lenn procuran per ina simbiosa denter natira e tecnica», di Karl Kleinhans dalla cuminonza da qualitad tudestga «Holzbrückenbau QHB». Las sfidas cumbinadas cun la sanaziun dils corridors per la selvaschina ord vesta dils cantuns ha Catherine Strehler dalla partiziun da biodiversitad e cuntrada dil cantun Vad dilucidau. Sco quei che Marguerite Trocmé digl Uffeci federal per vias (Astra) constatescha cumpeglia la reit da vias naziunalas il mument 30 punts per la selvaschina. Duas ulteriuras ein en construcziun e 16 en planisaziun. Facit dalla dieta: Suenter ch’igl ei vegniu fatg pauc duront plirs decennis per che la selvaschina sappi traversar las vias senza prighel fa ei prescha d’agir. Sara Wehrli, specialista per la selvaschina tier la Pro Natura, appellescha allas autoritads da nezegiar las novas pusseivladads tecnicas e d’accelerar las stentas en favur dalla sanaziun dils corridors per la selvaschina en Svizra.