Art – cun otg canzuns romontschas

Dad AUGUSTIN BEELI / anr

(anr/abc) Vendergis ei stau la vernissascha d’in grond project dalla Scolaviva Laax. 180 affons ein sefatschentai dapi il fevrer cun otg canzuns e cun transponer quellas en maletgs, sculpturas, installaziuns ed autras fuormas digl art. Ils dus artists Yvonne Gienal e Luis Coray han realisau a Laax in grond project d’art per e cun affons. Igl ei il pli grond che la Scolaviva Laax ha realisau entochen oz. Vendergis sera han ils affons giu tschaffen da presentar quei ch’els havevan creau ils meins e las jamnas vargai. Els ein sefatschentai cun art e musica romontscha en diversas fuormas e dimensiuns. L’emprema part dalla vernissascha ei stada ell’aula dalla casa da scola Grava. Leu ha la 5avla classa cantau la canzun «Unics», il musicist Pascal Gamboni ha accumpignau persunalmein ils affons. L’ovra en fuorma da pop-art cun quei tema han ins saviu admirar vid la preit ell’aula. La secunda scoletta da Laax ha cantau vigurusamein la canzun ladina «Il bös-ch rumantsch». Ils pigns ein s’occupai duront il project culla statteivla plonta, la ferma canzun da Linard Bardill ha inspirau la creativitad. Otg canzuns (mira scaffa) han animau mintga partiziun. Sco Coray ha declarau alla fin ha el stuiu surstar ch’ils affons han luvrau meinsvart vid lur project cantond ensemen la canzun empalonta da lur classa. Ils divers ateliers han pretendiu ina pulita organisaziun e logistica. Sco las duas moderaturas dalla vernissascha, Sina Brunold e Sabrina Bass, han puntuau ei quei stau pusseivel grazia a divers sponsurs ch’han viu il senn ed effect persistent dil project. Igl onn da scola current frequentan rodund 180 affons scola e scoletta a Laax. Tuts, igl entir menaschi, naven dallas scolettas e scola primara Laax e Falera, sco era il scalem superiur Laax-Falera-Sagogn-Schluein ein stai cumpigliai enten cumbinar art figurativ e musica romontscha. La secunda part dalla vernissascha ei stada ella casa da cultura Cularta. Leu, circumdaus dallas ovras da diversas classas, ha Coray presentau ina performance originala, ina mischeida da sault e musica. Suenter la vernissascha han ins caschun da visitar l’exposiziun dallas ovras tochen e cun vendergis, ils 24 da matg. Quella sera ei la finissascha festiva dil project. Giganto vegn ad esser presents, las classas vegnan a cantar ulteriuras canzuns romontschas.