Daplü cussagliaziun in ün ambiaint modern

(anr/fa) Davo la renovaziun chi ha dürà set eivnas es la sedia da la BCG a Scuol darcheu averta. A las cliaintas e’ls cliaints spetta üna halla da cliantella cumplettamaing nouva ed i vain sporta üna cussegliaziun cumplessiva. La Banca Chantunala Grischuna (BCG) ha modernisà sia sedia regiunala a Scuol e tilla adattada als nouvs bsögns da la cliantella. Richard à Porta, il manader da la regiun Scuol, e seis team spordschan a las cliaintas e’ls cliaints amo adüna l’intera paletta da servezzans da banca. Da quella paletta fan part la cussagliaziun d’investiziuns e l’administraziun da la facultà sco eir soluziuns individualas per dumondas da finanziaziun e provedimaint. Id es eir inavant pussibel da reglar simpels affars da banca sco far pajamaints e postar cartas. Id ha però istess dat müdamaints. Cun entrar illa banca bada il cliaint quai be da pais. In lündeschdi sur mezdi han preschantà à Porta, sia successura Cilgia Rest chi dvainta manadra da la regiun a Büman 2020 e Maja Andry, la manadra dal team cliaintella privata, als rapreschantants dals mezs da massa la banca in seis nouv vesti.

Nouva halla da cliantella

La sedia regiunala renovada nu dispuona d’ingüns fanestrigls plü. Invezza da quels es gnüda installada illa nouva halla pella cliantella üna recepziun moderna e centrala. Las cliaintas e’ls cliaints vegnan retschevüts in ün’atmosfera agreabla e discreta: Ils cusgliaders as mouvan libramaing e benevaintan da maniera directa a las cliantas e’ls cliaints. Ün chantun cun lounge invida da far üna posa e vain dovrà per chürar il contact culla cliantella. Ch’uschea possa la BCG as posiziunar sco banca da cussagliaziun moderna: «Grazcha al nouv concept da filiala eschan no amo plü dastrusch a nossas cliaintas e noss cliaints e vain daplü temp pella cussagliaziun persunala», s’ha allegrà à Porta. Illa sedia a Scuol lavuran eir in avegnir 15 persunas. «Cun seis nouv concept da filiala reagischa la BCG als bsögns da la cliantella chi s’han müdats i’ls ultims ons», ha’l declerà e dit ch’adüna daplüssas cliaintas e cliaints reglan ils affars da banca fond adöver da las pussibiltats electronicas. «Illas filialas vegnan els impustüt per cussagliaziuns persunalas.» Las transacziuns als fanestrigls s’han redüts tenor el i’ls ultims ses ons per var tschinquanta pertschient.

Automats amo plü moderns

Per simpels affars da banca stan a disposiziun illa sedia regiunala a Scuol apparats multifuncziunals chi spordschan differents servezzans. I’s po far pajamaints e giodair servezzans: Far pajamaints e retrar francs svizzers ed euros cun scumpartiziun da las notas tenor giavüsch, transferir imports d’ün conto a l’oter sco eir consultar il saldo dal conto. In cas da bsögn sustegnan ils cusgliaders a la recepziun a las cliaintas e’ls cliaints. Our dals temps d’avertüra sun ils automats accessibels ill’uschenomnada zona da 24 uras.

Il contact persunal i’l center

La BCG Scuol es averta da lündeschdi fin venderdi da las 08.00 fin a mezdi e da las 13.30 fin a las 17.00. «Discuors da cussagliaziun individuals sün dumonda nu sun pussibels be illas localitats da la banca, dimpersè eir a chasa pro las cliaintas e’ls cliaints», ha manzunà à Porta e dit cha la BCG investischa al medem temp in sias sportas digitalas per simplifichar ils affars da banca. «Exaimpels sun il center da cliantella ingio cha’ls cliaints pon postar online munaida bluotta chi vain tramissa a chasa per posta o eir fixar ün termin da cussagliaziun.»

Daplü davart las soluziuns online per reglar ils affars da banca da tuot las uras as chatta sün gkb.ch/digital