Il giug della reacziun catolica

dad Ursicin G. G. Derungs

Cuort suenter Pastgas ha la reacziun catolica lantschau la tiarza attacca (duas pli grondas ils davos onns) a papa Francestg. Igl ei ina brev da clericals e laics als uestgs per ch’els mettien il papa en stan da tgisa. Renfatschau vegn ad el «heresia», vul dir faulsa cardientscha. Mo en realitad han ils puncts de tgisa nuot da far cun la cardientscha ni cun «heresia». L’ignoranza teologica e la confusiun historica davos quels manevers emporta a lur iniziants atgnamein nuot.

Ei setracta da treis puncts della tgisa: el refusi da condemnar ils homosexuals; el laschi separticipar alla communiun ils cristifideivels divorziai; e terzo, el giustificheschi il pluralissem religius. En quels treis puncts vegn mischedau en empau dil tut, e la caussa semeglia plitost la canalisaziun dad auas neras nua che tut serimna e vess da vegnir eliminau, enstagl da vegnir mess danovamein en circulaziun.

Puncto homosexualitad: ei dat buca pli strentga condemnaziun della homosexualitad che da vart de quels ch’ein zuppadamein sezs homosexuals (reprimi). Il cudisch «Sodoma» da Frédéric Martel savess dar empau sclariment. E lu: la disciplina della eucaristia ei ual è tenor il Concil de Trient (1545–1563) che vegn per ordinari citaus en quei connex, misericordeivla: a tgi che separticipescha cun gests sentiments alla eucaristia conceda Dieus la grazia della penetienzia e relai «crimina et peccata etiam ingentia» (crims e puccaus era fetg gronds), sco in teolog talian regorda en La Repubblica dils 11 da matg. La posiziun della baselgia catolica viers autras religiuns ei vegnida sclarida el senn positiv dal Concil Vatican II.

Forsa eis ei mo casualitad che Joseph Ratzinger publichescha el Klerusblatt della Germania dils 11 d’avrel vargau ina posiziun che stat atgnamein buca lunsch naven dallas polemicas encunter papa Francestg. Igl ei in trest document; trest perquei ch’il vegl Ratzinger selai praticamein duvrar dalla reacziun catolica sco anti-papa, e nua che sias veglias posiziuns vegnan al plaid en moda plitost ruha, superficiala e penibla. Il maun digl anteriur papa para da vegnir «dirigius» da zatgi auter, siu entourage reacziunari ch’ha tentachels che tonschan tochen Cuera. En quei document scaulda Ratzinger puspei si sia veglia suppa, sia posiziun (fixaziun) encunter il ’68. La pedofilia seigi vegnida caschunada dalla «cumpleta libertad sexuala» perdegada ils ’68. Quei constat buc. Il mal della pedofilia ei vegls sco la carstgaunadad. «Cumpleta libertad sexuala» ei buca vegnida perdegada. Alla morala sexuala da camonds e scamonds ei vegnida opponida la «morala della responsabladad», e quei sil funs d’ina valutaziun sereina e positiva dil bein della sexualitad. En quei context fa il document de Ratzinger in mitgiert malpass encunter il defunct professer da morala Franz Böckle: «il bien Diu» hagi impediu a Böckle da scriver encunter l’enciclica «Veritatis Splendor» (06-08-1993) cun clamar el tier sesez gia ils 8 de fenadur 1991…

Insumma, en quei mument lavura la reacziun catolica (encunter Concil e papa) sin turas. Cun examinar pli da manedel tgi ch’ha suttascret la brev als uestgs, citada all’entschatta, per metter il papa en stan da tgisa, han ins constatau ch’ei setracta d’ina specia d’«Internaziunala Tradiziunalista», politica e religiusa, che vegn pervesida economicamein da Steve Bannon, american ch’ei dapi temps sesents ell’Italia. Il radius de sia activitad e dils problems colligiai cun la reacziun a papa Francestg seslarga enormamein. Las «heresias» ch’ins renfatscha ein en sesez mo in pretext. Papa Francestg stat en per igl ambient, el defenda ils migronts, el perdeghescha en favur dils paupers. Quei va encunter il streh dell’America de Trump che vul schar luvrar vinavon las centralas da cotgla che tschufrognan l’aria. Quei va encunter sia politica d’ereger mirs encunter il Mexico. La reacziun stat puncto ductrina sociala dalla vart de quell’America della rihezia selviada, ed il papa ei ina spina els egls de quella. Ussa vegnan aunc las elecziuns europeas (26 da matg proxim). L’America de Trump vul in’Europa suvranista, disunida, fleivla. Sch’ins ligia tut quels singuls elements denter els ed era cun il nunzi american en Svizra – representant della reacziun era el – e tut quei cul targlinem enten occupar la sedia episcopala a Cuera, e cun la pretensiun ch’igl uestgiu da Cuera «stoppi» esser conservativs per amur digl equiliber mundial della baselgia – lu stuess ins constatar che «Cuera» ei mo in tschep el grond giug encunter papa Francestg ed ina baselgia che viva per turnar agl evangeli e buca dalla pussonza de beins e privilegis.