Flem: Avunda suttascripziuns 
per l’iniziativa «Prau la Selva»

Ils iniziants han dà gas, suenter trais emnas èn las 250 suttascripziuns necessarias gia stadas ensemen. Uss ha la vischnanca da Flem otg mais peda per tractar l’iniziativa. L’iniziativa vul mantegnair e revitalisar il center da sport «Prau la Selva» a Flem. Ils 24 d’avrigl han ils iniziants entschet a rimnar per l’iniziativa. Quai suenter ch’els avevan gia inoltrà ina moziun cun passa 2000 suttascripziuns per la medema chaussa. Sin la moziun avevan els survegnì resposta pir cun reclamar. E la resposta è tenor ils iniziants stada pauc empermettenta. L’iniziativa duai vegnir surdada la fin matg, uschia l’iniziant Stefan Ueltschi. I fetschia tut in pau prescha perquai che la vischnanca da sia vart ha uss anc ina giada peda otg mais per tractar l’iniziativa. Il president da la vischnanca da Flem Adrian Steiger n’ha betg vulì prender posiziun tar questa iniziativa.