Gie ni na alla catscha speciala?

Da Hans Huonder / anr

Strusch in tema ha dau da discutar publicamein el Grischun ils davos meins sco l’iniziativa per abolir la catscha speciala. Dumengia proxima decida il pievel davart quella. Avon sis onns ei l’iniziativa vegnida inoltrada. Suenter ch’ella ei vegnida refusada dil cussegl grond sin proposta dalla regenza ei suandau ina procedura giudiziala e la finfinala ha la Dertgira federala decidiu che l’iniziativa stoppi vegnir suttamessa al pievel. Uss eis ei aschi lunsch e tuts pertuccai ein leds ch’il cumbat da votaziun va a fin dumengia proxima. Ils iniziants ein perschuadi che la populaziun da tscharvas sa vegnir reglada il settember ed october enteifer 25 dis da catscha. L’iniziativa pretenda numnadamein ina prolungaziun dalla catsch’aulta per quater dis e leutier la pusseivladad d’ir a catscha era igl october. Tut auter tuna ei davart dils adversaris dall’iniziativa. Per els e per las instanzas da catscha cantunalas eis ei clar ch’ei drova era egl avegnir ina catscha speciala il november e december per aschia puder regular efficientamein la populaziun da tscharvas. L’iniziativa che vegn dumengia en votaziun ei dil reminent buca la suletta ch’ei il mument sin tapeta el Grischun e che pertucca la catscha. Gia spetga la proxima, numnadamein quella «per ina catscha conforma alla natira ed etica» dall’uniun per la protecziun dalla selvaschina. Il termin persuenter ei aunc buca fixaus.

Pagina 3