La spitex ò presto 32 948 ouras a 246 cliaints

(pb) Las prestaziuns dalla Spitex Alvra/Churwalden per igl 2018 èn stadas agl rom digl onn avant. Gl’è do en lev augmaint tar las ouras prestadas. Ins è nia da frenar igl domber digls pasts furnias siva tgi chels eran dus onn sa sminuias. Igl chint da travagl sera cun en lev gudogn da 17 159 francs. La magnafatschenta dalla Spitex Alvra/Churwalden, Anna-Emilia Hemmi, aintra aint igl sies rapport annual sen igl motto tgi l’organisaziun è sa dada a sasez cun «collaboratours incantos incanteschan igls cliaints». Ins vegia tschartgea da veiver chel motto aint igl travagl da mintga de. E tenor igls resungs dalla clientella ins possa chintar dad esser sen la dretga veia. E per betg tgi la mutivaziun digl persunal sa steida ins organisescha regularmaintg occurrenzas cun la fegnameira da promover igl respect e l’avertadad vicendevla.

Sistem digital 
per s’annunztgier

La spitex è en’organisaziun derasada ainten l’antiera tera. Per dar a chellas uniuns da non-profit en’idenditad externa è igl logo nia unifitgia ainten l’antiera Svizra ed er l’Uniun da spitex Alvra/Churwalden ò fatg l’adattaziun an ples pass.

La digitalisaziun sa ferma er betg tar talas organisaziuns scu la spitex. Igl ageid digital sur igl handy per l’organisaziun digl persunal è gio introduia. Da nov dattigl en sistem digital tgi sa nomna Opan. Antras chel on spitals, medics ed er persungas privatas la pussebladad da far annunztgas tar la spitex. L’utilisaziun seia detg simpla ed er applicabla sur l’atgna homepage, dei Hemmi. Impurtant vedlonder seia er la siertad dallas datas. Tar la Spitex Alvra-Churwalden seia Opan anc ainten ena fasa iniziala, ma ins vegia gio gia 50 annunztgas sen chella veia igl 2018. Per giasts da vacanzas e cliaints d’accident/militer surpeglia igl cantun nignas cuntribuziuns. Chegl monta er tgi la Spitex Alvra/Churwalden ò nigna obligaziun da sarvetsch anvers chels cliaints. Scu regiun da vacanzas ins ò pero decidia da porscher igls sarvetschs er a chels cliaints, schinavant tgi la capacitad da persunal è avant mang. Igls costs restants siva dad aveir risguardo la contribuziun dalla sieranza ston pero neir adossos a chellas persungas.

Scolaziun e cultura 
da team

Tenor Hemmi è la scolaziun permanenta er ena part impurtanta per la lavour da mintga de. Uscheia è igl onn passo sto segl program en curs da chinestetica. Chella sparta dalla tgira contribuescha ena part impurtanta ainten en contact da respect e human anvers persungas tgi on da basigns da tgira. En tema da scolaziun è er sto igl management d’agressiun ainten la tgira. En tema adegna puspe actual da saveir eir anturn cun violenza.

En oter tema da scolaziun èn stos cass d’urgenza tgi pon adegna puspe succeder durant igl taimp da tgira. Ed alloura duess igl persunal saveir reager andretg.

Impurtanza vign do tar la Spitex Alvra/Churwalden ad ena buna cultura da team. Essend tgi las collaboratouras èn ple u manc adegna sulettas sen veia tar e cun la clientella valigl da tuttegna sa santeir scu team. Chegl ins tschertga da far cun differentas occurrenzas scu excursiuns ed inscunters interns.

En lev augmaint 
prest dapertot

Durant igl 2018 ò la Spitex Alvra/Churwalden purschia igls sies sarvetschs a total 246 persungas. E chegl cun 32 948 ouras da lavour. Chegl èn 4% daple tgi igl onn avant.

Chels sarvetschs prestos sa repartan cun 9983 ouras u 30,3% sen la tgira, cun 6006 ouras u 18,2% sen sarvetschs digl tigneirtgesa. Igl rest dallas ouras sa cumpona da viadis, ouras da biro, vacanzas, scolaziun e malsogna. Chests sarvetschs èn nias prestos antras total 33 persungas tgi on ansemen 15,53 plazzas cumplagnas.

En sarvetsch dalla spitex èn er igls pasts tgi vignan purtos a tgesa tar la clientella. Siva tgi ins ò introduia chel sarvetsch è el carschia cuntinuadamaintg anfignen igl 2015 cun 8823 pasts. Siva èn suandos dus onns tgi chel domber è sa sminuia. Uscheia eran igl 2017 anc 6807 u 77%. Ins sa dumandava schi chegl vigna ad eir anavant ainten chella direcziun. Per igl 2018 ins è nia da frenar chest svilup negativ e cun 7125 pasts ègl do en augmaint da tuttegna 5% anvers igl onn avant. Ena veira declaraziun per chel svilup ins ò atgnamaintg betg.

Alla finala anc las finanzas. Tenor lescha da malsangs surpeglia igl cantun 55% digls costs restants ed igls cumegns 45%. Per igl 2018 ò igl cantun contribuia 367 882 francs ed igls cumegns 293 749 francs. Dallas contribuziuns digls cumegns èn chegl 28.07 francs per abitant.

Tar las antradas contribueschan igls paziaints sezs antras las taxas ena part dad 883 592 francs. Las antradas digl sarvetsch digls pasts monta a 100 350 francs. Dantant on dus autos gia da neir ramplazzos. Chels on custo 33 320 francs tgi èn nias finanztgias sur igl fondo digls vehichels.

Tar antradas dad 1,676 miu. e sorteidas dad 1,659 miu. sa resulta en gudogn da 17 159 francs. Igl gudogn net è 3546.55 francs.