Prevendita da «Tredeschin Retg»

(cp) Las preparativas per las festivitads a chaschun dal giubileum da 100 onns da la Lia Rumantscha progredeschan. Dal 1. fin ils 18 d’avust 2019 ha lieu a Zuoz en Engiadin’Ota il festival da lingua e cultura «100 onns Lia Rumantscha». Las provas per il teater da giubileum «Tredeschin Retg» han cumenzà e la prevendita han ins lantschà il 1. da matg.

La Lia Rumantscha festivescha questa stad ses anniversari da 100 onns cun in festival da giubileum singular a Zuoz. Ultra d’in program ritg e varià cun passa 50 occurrenzas en connex cun la lingua e cultura rumantscha spetga las visitadras ed ils visitaders er il toc da teater «Tredeschin Retg» elavurà aposta per il giubileum.

«Tredeschin Retg» è l’istorgia davos l’enconuschenta paraula engiadinaisa che raquinta d’in 13avel figl che banduna il dachasa per tschertgar sia fortuna en pajais esters e per reconquistar il butin da guerra engulà per il retg da la Frantscha. Manfred Ferrari inscenescha il teater cun musica e saut. En il toc da teater fruntan il mintgadi ed il mund da paraulas in sin l’auter – cun consequenzas absurdas divertentas. Ils viadis da Tredeschin mettan en vista aventuras. Sia tschertga da fortuna daventa ina tschertga da l’atgna identitad. Durant ils viadis cun bastiment discutan ils mariners ed il protagonist da tge che la fortuna dependa. Èsi la pajaglia empermessa dal retg, la mesadad dal reginavel? La princessa? Ubain tuttina insatge tut auter?

Lorenzo Polin, oriund da l’Engiadin’Ota, gioga Tredeschin. Ulteriuras rollas occupan Annina Sedlacek, Anny Weiler, David Flepp, Nikolaus Schmid ed Ivo Bärtsch (saut). La musicista Astrid Alexandre (keys, voc) ed ils musicists Gion Andrea Casanova (fagot), Rees Coray (bass) e Rolf Caflisch (drums) fan ina giada part da l’acziun ed èn in’autra giada commentaturs musicals da l’istorgia.

Dapi il 1. da matg 2019 pon ins retrair ils bigliets da teater sin la pagina dal festival www.100onns.ch. Il bigliet da teater cumpiglia il viadi a Zuoz ed il return a chasa cun il traffic public entaifer il Grischun. Ils bigliets valan trais dis.

Survista dal program e prevendita «Tredeschin Retg»: www.100onns.ch