Cumplex da kinos 
a Cuira

Sin l’areal dal cumplex da kinos a Cuira vegn lavurà. Las lavurs dal fundament duajan bainbaud esser a fin, ha il patrun da construcziun Thomas Domenig senior ditg envers Radio Südostschweiz. Las lavurs al plazzal cuntinueschian. La construcziun brutta duai esser a fin en var in onn, ha ditg Domenig. El speria ch’il cumplex da kinos saja schizunt a fin sin la fin dal 2020. Las lavurs al plazzal cuntinueschan pia malgrà che plirs recurs èn anc pendents. Il Tribunal federal aveva decis la stad passada che las lavurs da construcziun possian cuntinuar, però sin agen ristg.

La midada dal clima porta blers ristgs: Dapli sitgiras, dapli catastrofas da la natira, pli gronds problems cun il provediment d’aua. Betg tut è dentant negativ. Il clima sin nossa terra sa mida. In studi da l’Uffizi federal per meteorologia prevesa ch’i dat il 2060 en Svizra 3–6 giadas dapli dis da chalira ch’anc oz (dis cun var 30 grads). Igl è era da quintar pli savens cun eveniments extrems sco incendis da guaud u inundaziuns.

Mardi saira ha Roland Hohmann da l’Uffizi federal per ambient referì a Cuira davart ristgs e schanzas da la midada dal clima. Oravant tut davart las schanzas vegn, per regla, discurrì pauc. I dat dentant singulas schanzas.

Agricultura: Lezza profitescha da relaziuns sitgas e chaudas. In bun exempel sajan las vignas, ha declerà Hohmann. Plinavant hajan ins era la pussaivladad da cultivar fritgs exotics.

Turissem: Il turissem da stad grischun po profitar da la midada dal clima. Cunquai ch’i vegnia en il sid adina pli chaud vegnian bleras persunas a decider da far vacanzas en las Alps.

Energia da stgaudar: Ils envierns vegnan pli chauds en il futur, uschia duvrain nus pli pauca energia da stgaudar, di Hohmann. Quai haja in effect sin ils custs e plinavant er in effect positiv sin las emissiuns che van or en il liber.