Il circus nu vain plü

DAD ANNATINA FILLI / ANR

Il plü vegl circus da la Svizra nu fascinescha plü al public cun seis program artistic. Il Circus Nock d’eira l’unic chi rivaiva on per on eir in Engiadina. Il temp cun la savur da resgüm, da popcorn e da mans d’uffants chi tachan da la vatta da zücher suot il chapiteau dal Circus Nock es i d’incuort a fin. Dürant las stagiuns visitaiva la famiglia Nock insembel cun seis artistas ed artists passa 50 lös da rapreschantaziuns in bundant 20 differents chantuns. Els d’eiran ils unics chi pigliaivan la via suot las roudas per allegrar als abitants e’ls giasts da l’Engiadina.

158 ons trategnimaint

Dürant 158 ons ha tratgnü il Circus Nock insembel cun seis artists la glieud in tuot la Svizra e pisserà per allegria. On per on han ils respunsabels provà da preschantar al public ün program amo plü interessant e lapro as sfadià da far adüna il meglder. «Regularmaing ans esa reuschi da promouver artists giuvens e da preparar per els la via per üna gronda carriera», manzuna la famiglia Nock in sia comunicaziun als mezs da massa. Il Circus Nock d’eira adüna darcheu pront per preschantaziuns particularas, spectacularas o unicas per la Svizra. Tenor ils Nocks es dvantà il far circus i’ls ultims ons adüna plü cumplex. «Plazzas centralas illas citads o i’ls cumüns dvaintan adüna plü s-charsas e plü pitschnas e’ls fits creschan on per on.» Plünavant han els survgni l’impreschiun cha’l circus nu saja plü uschè bainvis sco da plü bod. Sco tuot las otras gestiuns da circus es eir la famiglia Nock confruntada cun ledschas e prescripziuns plü severas, quai impustüt cun quellas chi resguardan il bainstar da las bes-chas.

Inrichamaint da la sporta da stà

Minch’on rivaiva il Circus Nock nan da Tavo in Engiadina Bassa. Plü bod giaiva tuot l’equipamaint cun camiuns e tractors sur il Pass dal Flüela e daspö divers ons per part tras il tunnel dal Vereina. Els faivan per ün pêr dis fermativa a Scuol, Zernez ed a Samedan. L’ultim lö da producziun in Engiadina d’eira San Murezzan. Qua gnivà installà il chapiteau per passa ün’eivna a Sur Punt e la gronda famiglia dal circus festagiaiva cumünaivelmaing la Festa naziunala. «L’aventüra d’ir a circus d’eira per nossa regiun da vacanzas üna fich bella sporta, impustüt pels indigens», uschè Madleine Papst da l’organisaziun Turissem Engiadina Scuol Samignun Val Müstair SA. Il circus d’eira, tenor ella, ün inrichimaint i’l chalender d’arrandschamaints, «quai eir sch’el d’eira be per ün cuort temp illa regiun». Ella spera cha la mancanza dal circus spordscha lö per nouvs evenimaints o dafatta per ün oter circus. Eir Roberto Rivola da la Engiadina San Murezzan SA deplorescha la decisiun da la famiglia Nock. «Minch’arrandschamaint ha s’importanza in üna destinaziun turistica, plü vasta cha la sporta es e daplü tscherna han l’indigen e’l giast», manzuna’l. Il Circus Nock d’eira ün evenimaint cun üna lunga tradiziun. «Las preschantaziuns da las artistas e’ls artists d’eiran üna part da la stà engiadinaisa e tuots pudaivan avair la garanzia da pudair ir dürant il mais d’avuost ad üna producziun da circus», conclüda Rivola.

Il plü vegl circus da la Svizra

La dinastia Nock ha seis origen i’l 17avel tschientiner ed es cun quai il plü vegl circus da tenda da la Svizra. Da l’on 1860 es la famiglia Nock ida la prüma vouta in viadi cun sia manescha e tenda tras la Svizra e dürant 158 ons han els fat quai minch’on. Fingià da quel temp d’eira Nock üna gestiun stabilida cun elefants, agen orchester, agen generatur ed artists da tuot il muond. Dürant il temp da la Prüma Guerra mundiala s’ha separada la terza generaziun. Da l’on1940 han ils trais figls da Pius e Klara Nock decis da far darcheu cumünaivelmaing circus e dad ir darcheu insembel sün turnea. Franz, Carl e Gustav Nock han investi in üna nouva tenda cun quatter püttas. Ün on plü tard ha destrüt üna strasora la tenda nouva. Cun la tenda da reserva han els cuntinuà la turnea per preschantar lur program suot la cupla dal circus. Duos ons plü tard es darcheu gnüda s-charpada la tenda e pervi dals temps da crisa nun ha pudü cumprar la famiglia Nock ün nouv chapiteau. La tenda es adüna darcheu dvantada victima da las strasoras e l’ultima vouta es quai capità da l’on 1992 a Lucerna.