Repower cun resultat operativ positiv

Da Flurin Andry

Las 161 acziunarias ed acziunaris da la Repower AG han acceptà il rapport e’l quint annual 2018 e dat di-
s-charg als organs respunsabels. Il concern prevezza da renovar per 150 milliuns francs las ouvras in Puschlav. La Repower AG cun sedia a Poschiavo ha salvà in marcurdi i’l center cultural e per congress Rondo a Puntraschigna sia 115avla radunanza generala ordinaria. Quella ha acceptà la proposta dal cussagl administrativ da pajar üna dividenda da 0.50 francs per aczia al nom. La distribuziun da s-chars 3,7 milliuns francs va a charg da las reservas da deposit da chapital. Da l’on 2018 ha ragiunt la Repower ün resultat operativ positiv. Il quint annual muossa pro üna prestaziun totala da 2,1 milliardas francs ün Ebit (guadogn sainza resguardar fits ed impostas) da 35 milliuns francs. La radunanza generala ha acceptà tant il quint annual sco eir il quint dal concern.

Krüsi: «Strategia porta früts»

Ils preschaints han reelet il cussagl administrativ culla presidenta Monika Krüsi, il vicepresident Peter Eugster e’ls commembers Urs Rengel, Martin Schmid, Claudio Lardi, Roland Leuenberger e Hansueli Sallenbach. «Pussibiltà il bun resultat annual da la Repower AG ha dad üna vart la situaziun dal marchà chi s’ha megldrada, da tschella vart porta però eir la strategia definida avant ün pêr ons uossa früts», ha dit Krüsi. Ella ha però averti cha l’interpraisa haja amo adüna üna rentabilità na sufficiainta. Ün böt essenzial dürant il prossem on da gestiun es perquai tenor ella da megliorar quista rentabiltà. «Ün’otra sfida per l’interpraisa es dad investir da maniera profitabla ill’energia indraulica.»

Bobst: «Cuntinuar culla medema strategia»

Il CEO Kurt Bobst ha manzunà il proget d’energia electrica Chlus e dit cha quel nu füss rentabel illa situaziun actuala dal marchà. Chi’s guarda perquai schi nu füss pussibel da survgnir contribuziuns federalas per realisar l’ouvra, ha’l agiunt. In quai chi reguarda l’on da gestiun passà ha Repower pudü, «grazcha a noss commerciants d’energia chi han interpretà inandret ils trends», profitar fingià bod dals predschs per forz’electrica plü chars. In sia vista vers l’avegnir ha Bobst accentuà cha la Repower cuntinuescha consequaintamaing la via inchaminada. «I’l marchà svizzer as voula cuntinuar ad optimar l’affar cul provedimaint d’energia e dar chüra a nossas ouvras idraulicas.» Sco ch’el ha dit prevezza la Repower AG per exaimpel i’l Puschlav da renovar lur ouvras idraulicas per var 150 milliuns francs. Brigitta Krapf chi maina las finanzas e’ls servezzans ha manià cha’l resultat annual da l’on da gestiun 2018 conferma il trend da l’on precedent: «Repower as sviluppa da maniera allegraivla, perquai pudaina far quint cha l’on da gestiun actual sarà amo meglder co quel passà.»