EX18 ha fatg in mudest gudogn

Da Hans Huonder / anr

Igl atun vargau ha l’EX a Mustér 
giu liug per l’endischavla ga. Sco 
quei che la presidenta dil comite d’organisaziun, Rita Huonder-Tenner, di eis ella stada in success trasatras. L’exposiziun ei vegnida visitada da rodund 9000 persunas. Sulettamein la dumengia ein las frequenzas buca stadas bunas, quei en emprema lingia pervia dalla schliat’aura. La dumengia ei vegniu nudau rodund 1000 entradas dameins che las dumengias dallas autras EX. La neiv da sonda sin dumengia ha lu era giu consequenzas negativas sin las frequenzas dil program da rama la sonda sera.

Animar ulteriuras 
fatschentas

L’EX18 ch’ha danovamein giu liug el Center da sport e cultura ha fatg ina sviulta da 280 000 francs. Tenor Rita Huonder ei la finfinala resultau in pign gudogn da 7000 francs. Quel seigi staus pusseivels sulettamein grazia al generus sustegn dalla vischnaunca da Mustér: «Tut en tut essan nus fetg cuntents cull’EX18. Ils resuns dils expositurs e visitaders ein stai trasatras positivs.» Fetg buna calamita hagi era la concurrenza Genius cattau. Cun quella vulan ils organisaturs cuntinuar, era denter las EX. «Nus lessen porscher quella plattafuorma d’ideas innovativas era igl onn vegnent e lu era alla proxima EX», di Huonder. Tenor ella duei la proxima fiera regiunala haver liug igl onn 2022, quei seigi era il giavisch da biars expositurs. Aschia duei il turnus da quater onns dils davos onns vegnir mantenius. Sche zaco pusseivel duei l’Uniun da commerci e professiun Mustér decider gia l’auter onn davart quella. In dils giavischs dils organisaturs per la proxima EX ei da puder animar dapli fatschentas dalla Cadi da separticipar. Igl atun vargau ein 90 stadas presentas cun lur survetschs e products. In success ei era l’organisaziun dil Forum Surselva el rom dall’EX18 stada. Tenor Huonder lessen ils organisaturs dil forum porscher lur arranschament danovamein all’EX22.

Dabia activitad

L’EX18 ei buca stada la sulett’activitad igl onn vargau sut il tetg dall’Uniun da commerci e professiun Mustér che vegn presidiada d’Edgar Durschei. Aschia ha ella scaffiu in mascot en fuorma d’ina vacca da plesch blau-alva ed organisau ina concurrenza pil num da quella. La finfinala ei il num Mustina ius cun la plema. Il mascot sa vegnir cumpraus en differentas stizuns e fatschentas. La suprastonza ha organisau in aperitiv ed ina sentupada dils indigens culs possessurs da secundas habitaziuns. Quella scuntrada en halla Cons ei stada in grond success. Las activitads ein vegnidas cumpletadas cun duas sentupadas da commembras e commembers dall’uniun cun la suprastonza communala, per aschia saver discutar davart ideas, giavischs e projects currents. La gruppa da lavur creativa ei s’entupada a differentas sedutas ed ha realisau denter auter l’idea dils pigneuls da Nadal decorai el vitg duront il temps d’advent e da Nadal. El vitg – denter Nervenschoner e moda Decurtins – ei vegniu plazzau bauns ed ina boxa cun cudischs e termagls. La finanziaziun ei vegnida procurada dallas tschun fatschentas vischinontas e dalla biblioteca. Igl onn vargau ei igl emprem magazin «Nus vivin nies Disentis/Mustér» cumparius. La secund’ediziun ei sin rucca e vegn repartida en tuttas casas – era secundas habitaziuns da Mustér – el decuors dil zercladur. Cun differents projects instradai vegn cuntinuau uonn. L’UCP ei carschida vinavon igl onn vargau, diesch commembras e commembers novs han saviu vegnir beneventai. Per la fin digl onn dumbrava l’uniun 93 commembers dallas vischnauncas da Trun ensi.