Las lavurs da sanaziun sun terminadas

Dad annatina Filli / ANR

L’on passà ha pudü gnir realisada la seguonda ed ultim’etappa da la sanaziun da la tecnica illa halla da Gurlaina a Scuol. Il cussagl administrativ es cuntaint cun l’andamaint da l’on da gestiun 2018. Al principi dal mais gün ha lö la 15avla radunanza generala ordinaria da la Gurlaina SA (Gusa) Scuol. A chaschun da quella pudarà Leta à Porta-Ritz, la presidenta dal cussagl administrativ, preschantar ün rendaquint cun ün resultat allegraivel.

Quel serra pro ün schmertsch da 365 000 francs cun ün guadogn da 26 500 francs. Cun plaschair vain manzunà i’l rapport annual la buna e constructiva collavuraziun culs partenaris, particularmaing quella cul cumün da Scuol e cul Club da hockey Engiadina.

Ragiunt ils böts finanzials

La halla da glatsch a Gurlaina pro Scuol es il dachasa dal Club da hockey Engiadina. Ils respunsabels da la Gusa han dürant l’on da gestiun pudü ragiundscher ils böts da la planisaziun finanziala. La fatschenda importanta d’eira la sanaziun dals implants tecnics. «Nus vain realisà la seguonda ed ultima etappa da quistas lavurs», uschè ils respunsabels da la Gusa. Grazcha als sforzs permanents per cuntantar la cliantella s’haja pudü bivgnantar ed accumpagnar a bod tuot las squadras chi d’eiran gnüdas eir i’ls ons passats a Scuol per lur trenamaints. Ils gronds chomps han lö per regla dürant ils mais da vacanzas lügl ed avuost. Sper quistas gruppas esa gratià d’acquirir ulteriuras squadras d’amatuors chi vegnan plüchöntsch d’utuon a far lur chomps da trenamaint cuorts. «In collavuraziun cul Club da hockey Engiadina esa stat pussibel d’organisar a Scuol la ‘Finalissima’, il final svizzer dal playoff da las categorias elita A dals juniors e da l’elita dals novizs.» Quist arrandschamaint ha gnü lö quist inviern passà per la seguonda vouta darcheu illa halla da glatsch a Gurlaina. Plünavant s’haja pudü realisar ulteriurs differents turniers d’uniuns. «Dürant quists arrandschamaints vaina adüna la pussibiltà da preschantar noss’infrastructura ad eventuals nouvs cliaints.»

Üna halla na be pel hockey

La halla da glatsch sta on per on a disposiziun eir ad otras societats per lur arrandschamaints. Tanter oter sun quai stats l’on passà il program tradiziunal chi accumpogna il Bike-Maraton intuorn il Parc Naziunal Svizzer, in avrigl l’Ebexpo 2018 e dürant il mais d’avuost las Maestranzas svizras da cuorsa d’orientaziun. Plünavant vain dat a fit dürant l’on plüssas voutas il restorant cun chadafö, il local da fitness sco eir il local per seminaris, «quai adüna per cuors ed arrandschamaints privats». Eir l’on passà han las scoulas da la regiun pudü giodair ün davomezdi sül glatsch. Dürant l’on da gestiun 2018 ha la Gusa pudü tour in consegn per la sanaziun dals implants tecnics üna donaziun da 100 000 francs. Il schmertsch da totalmaing 365 000 francs as cumpuona dal fit dal glatsch, da las contribuziuns dal Club da hockey Engiadina e dad ulteriuras entradas sco la fittada dal restorant o il patinagi. «Ils cumüns da Scuol, Valsot e Samignun han contribui 145 000 francs per la gestiun da la halla», uschè ils respunsabels da la Gusa. Davo avair fat amortisaziuns per l’import da passa 78 000 francs resulta ün guadogn da 26 500 francs chi dess gnir transferi al nouv quint.

Spargnar energia 
cun la nouva tecnica

Da prümavaira da l’on passà es gnüda realisada la seguonda ed ultim’etappa da la sanaziun tecnica. «Nus vain pudü finir la sanaziun punctualmaing e cun success», manzunan Leta à Porta-Ritz e Gerhard Hauser, directur da la Gusa. Eir il resfradamaint cun aua da scul ha pudü gnir tut in funcziun. Cun quista sanaziun esa pussibel da spargnar energia e quai daplü co quai chi d’eira previs. «Dürant il semester da stà vaina pudü redüer il consüm da forza electrica per passa 60 pertschient.» Qua cha la nouva ventilaziun da la halla es plü efficiainta restan ils svapurs da la maschina da pulir il glatsch illa halla. Perquai e pervi cha la maschina existenta d’eira veglia han ils respunsabels da la Gusa decis d’acquistar üna maschina cun motor electric. Sco üna da diversas masüras da sgürezza s’haja montà l’on passà las trapartidas da vaider acrilic e rimplazzà las fixaziuns dals gols.