Orientar, dumandar, discutar

(anr/abc) Margis sera han ins s’encurschiu ei: Il brat d’informaziuns ei necessaris e giavischaus. La suprastonza communala haveva envidau ad ina sera d’informaziun publica. Rodund 130 persunas han dau suatientscha. Ella seigi fetg satisfatga da quella sera, ha la presidenta communala Carmelia Maissen declarau en siu plaid final. Cuort avon haveva ella dau risposta alla davosa damonda ord las retschas dils presents. La suprastonza communala dalla vischnaunca fusiunada Ilanz/Glion ha envidau ad in’informaziun publica. Era sch’ella informescha regularmein e suenter mintga sesida dallas decisiuns pridas maunca la radunonza communala tonaton empau. A caschun da quella san ins «svidar il puppen» cun dumandar, reclamar e s’informar. Savens vegn schizun sevilau, quei ch’ei buca d’engrau per ina discussiun constructiva.

Gudogn brut da dus milliuuns

Margis sera han suprastonza e convischins menau ina tala. La presidenta communala ha informau, alternond cun ses collegas dalla suprastonza, dils fatgs actuals. Maissen ha dau in sguard sils davos tschun onns ed analisau la situaziun suenter la fusiun. Ins hagi forsa sutschazegiau il temps ch’ei drova per consolidar ina vischnaunca fusiunada. Suenter in onn e miez en uffeci sco presidenta communala trai ella ina bilanza positiva, la vischnaunca funcziuni bein, ei detti denton aunc biaras schanzas da secumprovar e migliurar la situaziun. «Nus essan cheu per sligiar problems, ensemen dumignein nus quei», ha ella manegiau. Quei che para da sequietar ei la situaziun dallas finanzas. Maissen ha saviu preorientar ch’il quen annual 2018 seigi excellents. La sisavla gronda vischnaunca dil Grischun ha contonschiu in gudogn brut da varga dus milliuns francs. Summas surproporziunalas tier las taglias sin gudogn da schischom ed ina rigurusa disciplina dils cuosts hagien alzau il bien resultat. 80 pertschien dallas investiziuns hagi la vischnaunca saviu finanziar sezza, quei che seigi ina fetg buna valur.

La geraua Caroline Gasser ha informau dil project «svilup dil center». Ensemen cull’uniun da commerci e mistregn ha la vischnaunca instradau in’analisa cun mesiras per augmentar l’attractivitad dil marcau da Glion sco center per regiun e visitaders. Ils 30 da mars ei ina gruppa preparatorica s’entupada per tractar quella tematica, la fin da zercladur vegn ei a dar ina valetaziun publica cun in muossavia da mesiras ed acziuns. La presidenta communala ha lu orientau da quei che schabegia proximamein sin ed entuorn la staziun da Glion. Ils 22 da zercladur vegn la Viafier retica ad inaugurar ils binaris novs cul sutpassadi. Lu vegn dau l’entschatta allas proximas etappas cun niev plaz dils autos da posta, il parcadi P+R a Pendas, la sanaziun dalla Via dalla staziun ed il concept per velos. In project grond sin plaun administrativ ein la fusiun da 13 leschas da baghegiar e planisaziuns localas. Aunc uonn vegn la populaziun a saver prender posiziun en caussa en ina votaziun all’urna.

Center da transcargar duei svanir

Il vicepresident communal Damian Cadalbert ha informau dallas meglieraziuns da funs da Pigniu e Schnaus ch’ein idas a fin. Lu era dalla situaziun culla reit da vias communalas da 300 kilometers. Prioritad han las vias da meglieraziun a Riein ed a Ruschein, igl ei ovras realisadas avon varga 40 onns. Hanspeter Bundi, sco gerau da scola, ha dau ina survesta da quei menaschi cun 500 affons ed 85 persunas d’instrucziun. Alla Scola da talents sto la vischnaunca dar quitau special, igl ei ina scola da referenza e da reputaziun surregiunala. Damai ch’igl interess ei carschius talmein ha la regenza lubiu da menar duas classas parallelas cun mintgamai 18 scolars enstagl 16.

Roman Cantieni ha presentau las duas caussas che vegnan dumengia en votaziun. Inagada eis ei la candidatura da Manuel Montalta pil post vacant el parlament communal, lu la midada dil contract da concessiun cull’Ovra hidraulica Zervreila SA per l’energia da participaziun. La presidenta communala ha la finala informau dad ulteriurs projects pendents. Denter auter ha ella getg ch’ins hagi scaffiu ina meisa rodunda ufficiala per discutar il futur dil center da transcargar dall’aua da Val ella Via Santeri. Adina puspei dat ei reclamaziuns d’habitonts pervia dalla canera la damaun baul. Sco Maissen ha sincerau vegn quei center a svanir, cu seigi denton aunc buca definiu. Ella ha era informau – sper divers auter – che la ludoteca e la termagliera dils affons pigns vegnien naven digl uost ellas localitads libras dalla stizun Negozi el marcau vegl da Glion. Igl ei in dils pli pigns projects.

La vesta el futur dalla vischnaunca Ilanz/Glion ei denton buca stgira. Ei detti bia da far, ha Maissen sincerau ed allegau ch’ella hagi buna speronza pigl avegnir dad Ilanz/Glion. Ei seigi mo impurtont da tschentar las dretgas prioritads, da buca prender la curascha cun spargnar e strihar senza fin e misericordia. Per levgiar igl access all’informaziun ed al biro dalla direcziun communala introducescha la suprastonza communala la schinumnada «ura dalla presidenta». Ei setracta d’in’audienza persunala ch’ella conceda mintgamai l’emprema gievgia dil meins la sera dallas 17.00 tochen allas 19.00. Ils 4 da fenadur spetga ella l’emprema gada visetas en Casa Cumin. Alla fin dall’orientaziun han divers dils presents tschentau damondas, fatg objecziuns e dau vinavon als presents informaziuns d’interess general.