Manuel Montalta 
el parlament

(anr/sr) A caschun dallas votaziuns communalas han votantas e votants dalla vischnaunca Ilanz/Glion concediu in credit brut da rodund 3,7 milliuns francs (inclus in’eventuala carischia) per la sanaziun dil provediment d’aua da Luven. Quei cun 1136 vuschs persuenter e 269 vuschs encunter.

Sco parlamentari niev e representant dalla fracziun Glion ei Manuel Montalta vegnius eligius cun 719 vuschs el parlament communal dad Ilanz/Glion.

Il concern d’agrochemia e da farmazia tudestg Bayer ha pers en ils Stadis Unids er il terz process davart glifosat. In pèr maridà che ha cancer aveva purtà plant. Ina dretgira da giuraders en la California ha sentenzià il concern da pajar passa duas milliardas dollars sco indemnisaziun al pèr maridà. Tenor l’um e la dunna ch’èn omadus sur 70 onns è la substanza dispitaivla glifosat la culpa da lur malsogna da cancer. Els hajan duvrà durant blers onns il med cunter zerclim Roundup che cuntegna glifosat. Il pesticid Roundup è in product da la firma Monsanto, ina societad affiliada da Bayer. Il concern tudestg di vinavant ch’il pesticid na saja betg privlus. Ed era l’autoritad americana per l’ambient di quai. Aifer paucs mais è quai gia la terza sentenzia cunter Bayer en connex cun glifosat, ed ulteriurs process suondan.

Tar l’emprima cursa da la Cuppa mundiala da cross-country ad Albstadt en Germania è il mountainbiker sursilvan Nino Schurter sulettamain vegnì 6avel. Gudagnà la cursa ha il Bernais Mathias Flückiger avant l’Ollandais Mathieu van der Poel ed il Franzos Jordan Sarrou.