Casa d’Angel: La nova exposiziun

(anr/abc) La Casa d’Angel a Lumbrein seprofilescha dapi zacons onns cun exposiziuns specialas. Suenter quellas dalla crappa e dallas midadas suonda ina proxima cul tetel «Futur – art pigl avegnir». La vernissascha ei dumengia suentermiezgi, ils 9 da zercladur. Dacuort ha la menadra dalla Casa d’Angel, Anne-Louise Joël, annunziau la nova exposiziun che vegn inaugurada lu. Las davosas exposiziuns han tractau ils passadis sur ils cuolms, ein sefatschentadas cun electricitad, cun clavaus, cun crappa, cun maletgs dalla Capauliana e cullas midadas ch’ein en vitgs e cuntradas. En quei senn cuntinuescha era la proxim’exposiziun. Ei s’auda tier igl intent dalla Casa d’Angel e dalla fundaziun da cultura da presentar tematicas ch’han connex culla vallada.

Cun «Buatsch Festival Tersnaus»

Uonn ha la menadra envidau Michael Hiltbrunner sco curatur dall’exposiziun. Il tetel «Futur – art pigl avegnir» ei concepius en treis lungatgs, romontsch, tudestg ed engles. Ins astga esser plein marveglias co igl antropolog da cultura, docent e perscrutader d’art ha concepiu ed endrizzau la Casa d’Angel a Lumbrein per quella novissima exposiziun. El sez ha gia creau performances d’art a Basilea, Londra, Vienna, Nyon, Moscau ed auters marcaus. Sco quei che la fundaziun da cultura communichescha en siu preavis tier l’exposiziun sefatschenta quella culla damonda: «Co vulein nus viver egl avegnir cheu en nos vitgs muntagnards?» Las artistas Agnes Barmettler, Jacinta Candinas, Sandra Knecht, Celia Längle ed Ella Littwitz, igl artist Christian Ratti ed il giuven collectiv da Tersnaus realiseschan projects els vitgs dalla Lumnezia e tschercan il contact cun expertas e habitonts. Sco gia tier las davosas exposiziuns ei era la nova buca statica, mobein en moviment. L’exposiziun da basa muossa puspei ovras ord la Fundaziun Capauliana, quei en cumbinaziun cun ovras d’artists sco Remo Albert Alig, Evelina Cajacob, Tresa Deplazes, Corsin Fontana ed auters. Bia ei art experimental che pretenda ina certa aviartadad pil niev, per stuschar cunfins. Per sviluppar novas ideas pil futur ein tals experiments d’impurtonza. La multifariadad metta el center la Lumnezia. Ella Casa d’Angel dueien ins s’encorscher e sentir ch’igl art duei daventar in impurtont partenari el discuors actual davart il futur dils vitgs muntagnards. Sco gia ils onns precedents dat ei in reh program accumpignont duront l’entira stad. Denter auter envida il Collectiv Tersnaus ils 2 e 3 d’uost ad in’occurrenza cul tetel «Tuor da siemis – Buatsch Festival Tersnaus». Ei setracta d’ina tuor che vegn construida da tuts e da tuttas cun lur siemis, ideas e patratgs sur dalla veta muntagnarda. «Lumnezia el bus da camping» ei ina contribuziun accumpignonta dad Agnes Barmettler per l’exposiziun ella Casa d’Angel. L’artista pren dimora els vitgs ed uclauns e plidenta interessai tier la damonda co nus vulein viver. Cultura en Lumnezia dalla stad ed atun 2019 porscha ulteriuras occurrenzas e sentupadas attractivas.

Ulteriuras informaziuns mira

www.culturalumnezia.ch