Cun buna morala dad 
1:4 da pausa tier in 4:4

DA GABRIEL DERUNGS

Strusch entschiet il giug ein ils Lumnezians gia cun 0:1 en disavantatg. Exact quei ch’els han vuliu evitar ei puspei capitau. Andri Grischott siara giu l’emprem’attacca dils hosps da Tusaun/Cazas cun marcar il gol d’avantatg per sia squadra. Denton gia otg minutas pli tard gartegia a Mauro Demont in bi pass sin Yanick Demont e lez realisescha igl 1:1. Suenter quell’entschatta turbulenta sesprovan omisduas equipas da surprender il domini dalla partida. Il giug vegn pli e pli dirs ed emoziunals. In penalti dispiteivel per Tusaun/Cazas nezegia il capitani Martin Neuhaus da sittar igl 1:2 ella 25.min. Cuort suenter quei gol gartegia ei danovamein a Yanick Demont dad egualisar. Quei gol vegn – per gronda surpresa – annullaus digl arbiter che ha sco ei para viu ina posiziun ord giug da Yanick. Ussa piardan ils Lumnezians empau il fil, forsa era perquei ch’els han seschau inflluenzar memia fetg dallas decisiuns digl arbiter. Tusaun/Cazas nezegia quella situaziun ed ella 32.min. sieta Marco Sax igl 1:3. Mo paucas minutas pli tard survegnan ils hosps in culp liber sin 20 meters. Janis Senn plazzescha il bal ella reit dil Lumnezians, quei che munta igl 1:4 e ch’ei lu era il resultat da pausa. In resultat che corrispunda buc allas prestaziuns mussadas sil plaz.

Lumnezia dominescha 
la secunda mesadad

Probabel ch’ils da Tusaun/Cazas ein sesenti memia segirs da lur victoria entras quei clar avantatg. Ils Lumnezians perencunter han mussau ina ga dapli che lur morala ei aunc adina intacta. Cun niev slontsch ed anim vegnan els ord la cabina e surprendan immediat il commando el giug. Lur stentas vegnan lu era remuneradas. Il capo-settagols Yanick scursanescha cun in bi siet ella 56. min sin 2:4. Quei gol dat novas forzas als indigens e sin ina biala flanca da cantun da Dino Blumenthal realisescha Mauro Demont il 3:4. Attacca sin attacca suondan, ils da Tusaun/Cazas vegnan strusch pli da sedeliberar. Ils Lumnezians fan tut il pusseivel per evitar ina ulteriura sperdida. Cuort avon la fin, ella 90.min., croda lu era il gol d’egualisaziun entras Danilo Blumenthal. E quel ei pli che meritaus.

Il trenader Giacun Vincenz ei fetg cuntents culla morala da sia equipa. El ei denton trumpaus dalla prestaziun digl arbiter, el che critichescha schiglioc buc en moda negativa ils arbiters ha en quei giug veramein giu il sentiment che sia equipa hagi stuiu prender encunter pliras decisiuns nuncapeivlas e decisivas. Treis puncts vessien dau nova speronza ella lutga encunter la relegaziun. El ei denton perschuadius che sia equipa resti vinavon positiva, independent dils resultats els giugs restonts.

3. ligia

Lumnezia – Tusaun/Cazas 4:4 (1:4)

Plaz Bual, Vella, 150 aspectaturs. Arbiter: Braunwalder Daniel.

Gols: 1. Andri Grischott 0:1, 9. Yanick Demont 1:1, 25. Martin Neuhaus 1:2,

32. Marco Sax 1:3, 35. Janis Senn 1:4, 56. Yanick Demont 2:4, 65. Mauro Demont 3:4,

90. Danilo Blumenthal 4:4

Lumnezia: Martin Mark; Mauro Cadonau, Remigi Collenberg, Matias Alig, Dario Capaul;

Paul Alig (61. Attila Truffer), Dino Blumenthal (77. Danilo Blumenthal), Pascal Derungs (47. Tizian Casanova), Danilo Blumenthal (66. Nando Blumenthal); Mauro Demont, Yanick Demont.

Tusaun/Cazas: Patrick Kienast; Christof Spörri, Roman Canonica, Janis Senn, Sandro Caminada; Martin Neuhaus, Samuel Komposch (Robin Tillessen), Dario Rüedi, Marius Spiller (30. Andrin Brenn); Marco Sax, Andri Grischott.

Cartas melnas: Martin Mark, Dario Rüedi, Matias Alig.