Brat musical cun l’Eritrea

(anr/hh) Il musicist Samuel Mesfin dall’Eritrea ha concertau per l’emprema ga en Svizra. Quei ha il giuven ella vegliadetgna da 24 onns fatg l’jamna vargada el rom d’in concert da solo el Center sursilvan d’agricultura a Mustér. La sentupada cul concert ei stada el senn digl intent dil Forum intercultural Mustér ch’ha organisau la sera. Sia finamira dil forum ei da tgirar la cultura en sias pli differentas fuormas, promover ils contacts enteifer minoritads dallas differentas gruppaziuns linguisticas e tgirar il scomi cultural. La sentupada a Salaplauna ei lu era stada en quei senn. Buca mo pervia dalla cultura dil musicist dall’Eritrea Samuel Mesfin, mobein era pervia dalla viseta da glieud da differentas tiaras e culturas che vivan el contuorn da Mustér. Mesfin ch’ei da casa el center da transit per requirents d’asil Bellavista a Mustér suna igl instrument «krar». Igl ei in instrument a corda, semeglionts ad ina ghitara. El vegn sunaus ell’Etiopia ed Eritrea. Igl instrument ha el schau construir ell’Italia. El constista ord lenn, strubas e cordas. Mesfin ha interpretau tocs en tigre e tigrinya, dus lungatgs parentai che vegnan tschintschai ell’Eritrea. Schegie ch’il publicum ha buca capiu ils texts ha la musica tonaton muentau ed animau ad enqual patratg, independentamein danunder che las canzuns derivan e danunder ch’ils auditurs ein. Las canzuns – aschia Mesfin – tractan ils cuolms, caussas, animals e carstgauns. Pil pli ein ellas divertentas, magari era cun cuntegns trests. Avon che vegnir ell’Europa eis el staus musicist ell’Eritrea. Dapi treis onns eis el en Svizra, igl emprem els centers per requirents d’asil a Litzirüti ed Arosa, dapi entginas jamnas eis el a Mustér. Entochen uss eis el sepresentaus en Svizra sulettamein en societads serradas sco nozzas, il concert a Salaplauna ei staus igl emprem public.