Fiastas s’avischinan

dad augustin beeli / anr

Sco quei ch’ei s’auda per ina fiasta va la musica ordavon cun marsch e bandiera. La Musica da Glion fa quasi l’uvertura dallas festivitads ch’ein proximamein ella vischnaunca Ilanz/Glion. In comite ei actualmein ella planisaziun fina dallas lavurs. Las festivitads a Glion han retschiert il tetel «Reuniun – s’entupar e festivar da cuminonza». Pli che 200 carschi ein involvi en in program pulpiu e variont. Vitier vegnan aunc ils 500 affons. Oz en in meins, ils 22 da zercladur, ei la fiasta da e culla populaziun dalla vischnaunca. Tuts affons dalla scoletta tochen tiel scalem superiur, ensemen cun 85 persunas d’instrucziun, presentan vendergis, ils 21 da zercladur in agen program en ed entuorn la casa da scola a Glion. Las festivitads «Reuniun» entscheivan denton aunc avon, e quei da gliendisgis Tschuncheismas cun in survetsch divin ella baselgia da s. Margreta. La sonda dils 22 da zercladur vegnan lu quasi tuts 4700 habitonts e habitontas ad esser sin vias e plazzas da Glion. Agl act festiv separticipescha il president dalla regenza grischuna. Dapi in onn ein las 13 fracziuns vidlunder da semtgar in program cun colorits locals.

pagina 3