Pagar taglia pigl agen habitar?

(anr/abc) Gliendisgis sera ha l’Uniun da commerci e mistregn Alpenarena envidau, ensemen culla Partida liberaldemocratica Surselva, ad ina sera d’informaziun e discussiun a Laax. Il Grischun senza in’imposiziun da taglia sill’atgna locaziun? Quella damonda ei stada el center dalla sera che l’Uniun da commerci e mistregn Alpenarena (UCM) ha organisau gliendisgis vargau. Finamira da talas seras eis ei da dar impuls, d’intimar, discutar e metter en damonda certs process e sistems.

L’Uniun dils possessurs da fatschentas da Flem, Laax, Falera e contuorn ha envidau ad ina sentupada cun informaziuns da cusseglier dils cantuns Martin Schmid. El center ei la damonda dall’imposiziun da taglia sill’atgna locaziun stada. Naven digl onn 2023 sappi quei senz’auter esser ina realitad, ha il representant grischun a Berna dau d’entellir en sia moda e maniera eloquenta. El ha explicau la caussa e las consequenzas che quei havess per possessurs da casas ed habitaziuns.

Lorenz Alig, il deputau liberaldemocrat dalla Foppa, ha aviert la sera en num dall’Uniun da commerci e mistregn Alpenarena e la pld Surselva. L’occurrenza el hotel Laaxerhof a Laax-Murschetg ei daventada ina biala e buna tradiziun per s’approfundir en ina materia ch’ei magari buca sempla da capir.

Il fatg ch’ins sto pagar taglia per l’atgna locaziun fatschenta dapi onns ina gronda part dalla populaziun. Buca mo ils 300 000 commembers dall’Uniun svizra dils proprietaris da casas han breigias da capir il motiv dall’imposiziun. Sco commember dalla cumissiun dil cussegl dils cantuns per economia e taxas ei Schmid igl expert per declarar la caussa. Duront siu referat da gliendisgis sera ha el discurriu cun sias enconuschientschas specificas dalla materia. Ils presents han capiu spert che l’imposiziun sedrezza tenor l’altezia dils agens deivets, era la tariffa dil tscheins hipotecar ha in’influenza. Capir quei ei essenzial per saver giudicar ils avantatgs e disavantatgs d’in cantun Grischun senza imposiziun da taglia sill’atgna locaziun.

Suenter il referat da Schmid ei il niev candidat pil cussegl naziunal ed interprendider Martin Bundi sepresentaus. El ei bein in numalin digl anteriur cusseglier naziunal da Sagogn, ha denton tut autras ragischs e derivonza.

Bundi, naschius 1981, habitescha a Trin, el ei maridaus e bab da treis mattatschas. Per saver garantir alla populaziun grischuna el futur plazzas da lavur interessantas vesa il commerciant e fiduziari ina gronda schanza ella digitalisaziun. Per quei less el s’engaschar era sco cusseglier naziunal a Berna.

Ellas retschas digl auditori han ins viu ina roscha interessai ed involvi ella politica, deputai, denter auter la scheffa dalla fracziun liberaldemocratica el parlament cantunal. Vera Stiffler candidescha medemamein per in mandat a Berna.

La sera d’orientaziun e discussiun a Laax ha Urs Cadruvi moderau. Alla fin ha il president dalla pld Surselva, Erwin Vincenz, Laax, envidau tut ils presents ad in aperitiv. Igl ei stau la caschun da tgirar il contact denter interessai alla politica ed economia regiunala tochen naziunala.