Turitg e Grischun vulan collavurar per dapli pernottaziuns

Turissem Turitg e Grischun Vacanzas coopereschan strategicamain e lavuran pli stretg ensemen per carmalar dapli glieud en citad ed en la muntogna. Quai ha communitgà Grischun Vacanzas. En emprima lingia vulan las duas organisaziuns propagar la stad en martgads pli en il lontan.

ll Grischun sco pli gronda regiun muntagnarda e Turitg sco center urban da la Svizra sa cumpletteschian optimal, scriva Jürg Schmid, il president da Grischun Vacanzas. Perquai vulan las duas organisaziuns turisticas collavurar.

En il focus da la cooperaziun stat da commerzialisar la stad, quai cun eveniments che collian omaduas regiuns. Adina dapli giasts tschertgian dasper l’experientscha urbana er da pudair sa revegnir en ils culms, ha ditg Guglielmo L. Brentel, president da Turitg Turissem. Gist per giasts da l’exteriur sajan viadis da duas fin trais uras savens be dus pass.

Finamira da la collavuraziun è dad unir las forzas per che omaduas varts possian profitar dals giasts en lur regiun. En il turissem da las Alps dovria models novs sco quest per pudair augmentar il dumber da pernottaziuns, di Schmid. Quai stgaffeschia per ils giasts ina plivalur.

La reputaziun da las bancas svizras tar Svizzers e Svizras è sa meglierada ferm. Quai mussa in studi da l’Associaziun svizra da banchiers. Ina tenuta uschè positiva aveva la populaziun la davosa giada avant la crisa da finanzas dal 2008. La mesadad dals Svizzers e da las Svizras vesan lur tenuta vers la banca sco positiva, 7% perfin sco fitg positiva. Quai che pertutga la sort da banca che vegn preferida èn las bancas regiunalas davanttiers cun 95%. Pauc davos èn las bancas chantunalas. 90% dals dumandads han ina tenuta positiva envers quellas.