Ils giasts svizzers èn fidaivels

DA GION NUTEGN STGIER / ANR

L’onn 2018 èn las pernottaziuns s’augmentadas en il Grischun per 5,7%. Anc sa lascha quel dumber na cumparegliar cun las pernottaziuns d’avant 10 onns. Jürg Schmid resta per ils proxims trais onns president da l’organisaziun turistica. Grischun Vacanzas è l’organisaziun tetgala dal turissem da noss chantun. A quella organisaziun appartegnan 18 destinaziuns da vacanzas da l’entir chantun. En noss chantun datti passa 700 hotels e lura 70 000 abitaziuns secundaras. Vitiers vegnan lura anc las bunamain 8000 abitaziuns che vegnan affittadas per vacanzas. Grischun Vacanzas segna cunzunt per il marketing naziunal e cunzunt er internaziunal.

Anc mancan ils giasts chinais

L’acziun da carmalar daplis giasts da l’Asia e dals Stadis dal Golf haja bain carmalà intgins giasts da quellas naziuns en il Grischun, dentant saja anc in grond potenzial, ha ditg Jürg Schmid. La Svizra haja 23% giasts da l’Asia e da l’Orient ed en il Grischun giaschia quella cifra tar 6%. Cun acziuns e promoziun pi intensivas vuless Grischun Vacanzas daventar anc pi activ cun il marketing en quels pajaias. Insumma hajan ils hotels grischuns anc in grond potenzial cun in’occupaziun annuala da 31%, ha menziunà Schmid. Martin Vincenz, il directur da Grischun Vacanzas, ha ditg ch’il giast restia oz be pli 2,6 dis en in hotel, quai che saja en cumparaziun cun il Voralberg cun ina media da 3,6 bain in pau pli pauc.

61% èn giasts svizzers

L’onn passà han 5,132 milliuns giasts pernottà en il Grischun. Quai èn 5,7% dapli che anc l’onn precedent. En cumparaziun cun las autras grondas destinaziuns da vacanzas da la Svizra e dals pajais vischins ha il Grischun gì il pli grond augment tar las pernottaziuns l’onn 2018. Il Vallais ha gì 5,3% dapli pernottaziuns, la Surselva bernaisa 5,0% daplis giasts, il Vorarlberg ha scrit in augment dad 1,2%, il Tirol, noss grond concurrent, ha fatg 2,1% daplis pernottaziuns e tar il Tirol dal sid giascha quel agument tar 2,0%. 61% dals giasts che pernotteschan en il Grischun derivan da la Svizra, 17% da la Germania, e bunamain 7% dals Stadis Unids da l’America, da l’Ollanda e da l’Engalterra. Sin facebook ha il Grischun da preschent gia 209 993 fans e la pagina d’internet da Grischun Vacanzas ha gì passa dus milliuns uschenumnads «clicks» be l’onn passà. Gist tschintg milliuns giadas èn ils divers videos da Grischun Vacanzas vegnids guardads sur la plattafurma youtube. La plattafurma GRhome ha fin oz 8000 partenaris, è vegnì ditg ier a Laax sin il Crap Sogn Gion.

Tuts restan en suprastanza

En tavla èn er stadas elecziuns e positiv è che da la suprastanza n’aveva nagin demissiunà. Cun applaus han lura ils preschents reelegì Jürg Schmid sco president da Grischun Vacanzas per ils proxims trais onns. El è en tuttas modas e manieras in um dal rom, cun esser stà blers onns directur da Svizra Turissem ed er cun avair relaziuns e buns contacts sin l’entir mund. Ultra da quai ha el cun il Grischun ina relaziun fitg stretga, cun avair a Lai in’abitaziun da vacanzas. Confermads en lur uffizis èn er vegnids Andreas Züllig, il vicepresident da l’organisaziun, Corinne Denzler, Markus Gschwend, Renato Fasciati e Reto A. Wilhelm.