Regal ed obligaziun

(anr/gv) Avon in onn han Andreas e Barbara Baselgia surpriu il Hotel Greina a Rabius dils geniturs Duri ed Aurelia. «Nus havein l’intenziun da realisar ina cuschina da qualitad per in e scadin», haveva Andreas detg cun quella caschun. Ils ustiers en quarta generaziun han teniu plaid. Quei ha Toni Darms saviu constatar. Igl anteriur ustier da gourmet da Glion ei igl ambassadur grischun dalla «Gilda dils gastronoms etabli». Dacuort ha el saviu surdar ad Andreas e Barbara Baselgia la tabla dalla Gilda ed el ha detg: «La tabla dalla Gilda ei buca mo in regal, mobein era in’obligaziun enviers nossa famiglia dalla Gilda.» Il Grischun dumbra 27 menaschis dalla Gilda. Ell’entira Svizra dumbra la Gilda sulet treis menaschis cun tschun crunas, dus da quels menaschis ein el territori tgiraus da Darms. Tschun crunas ha la Gilda dau alla Stiva Veglia da Schnaus ed a La Riva a Lai. Il tierz sesanfla ella Surselva bernesa.

Avon 65 onns han cuschiniers engaschai fundau la Gilda per tschentar criteris da qualitad ella gastronomia. Commembers dalla Gilda ein sulet menaschis cul cuschinier ch’ei sez possessur. Auters criteris ein ina cuschina creativa cun products frestgs e la tgira persunala dalla clientella.

Andreas Baselgia ademplescha dapi onns ils criteris dalla Gilda. Avon che surprender avon in onn il menaschi da famiglia ha il cuschinier luvrau el Hotel Central a Sursaissa sco capocuschinier. Era a quei menaschi culla cuschina remunerada cun 13 puncts da Gault Millau ha Darms saviu surdar la tabla dalla Gilda. Quei ei succediu la stad 2015.

A caschun dall’entschatta da siu engaschi a Rabius ha Andreas Baselgia manegiau che puncts da Gault Millau seigi buca si’emprema finamira, mobein in menaschi el qual il client retscheivi adina ina buna tschavera. Cun quella finamira ha el secapescha era leventau igl interess digl impurtont guid d’ustrias che ha remunerau sia cuschina cun dudisch puncts.