«Sajas tuts curaschus»

DA GION NUTEGN STGIER / ANR

La suprastanza da l’organisaziun turistica Grischun Vacanzas è vegnida reelegida. Marcus Caduff, il cusseglier guvernativ e manader dal departament da l’economia publica, ha ludà la qualitad e l’innovaziun dals turistichers en noss chantun. La radunanza da l’organisaziun da turissem Grischun Vacanzas ha gì lieu ier a Laax e quai al Crap Sogn Gion. Quai vul dir ch’ils purtaders dal turissem da noss chantun èn ids per intginas uras ad aut. Marcus Caduff, il cusseglier guvernativ lumnezian, ha represchentà la regenza grischuna ier en Surselva. El ha ditg d’avair gì grond plaschair cun sentir las novitads positivas da las pendicularas grischunas che hajan gì ina buna stagiun 2018/19. Il medem haja el er udì dal turissem en general. Quai fetschia fitg bain a tut l’economia ed a l’ambianza generala. Quella saja da preschent fitg buna, gist suenter ina stagiun d’enviern sco la davosa, cun success e blers giasts cuntents. La raschun che cun il turissem saja puspè ì ensi saja cunzunt er d’attribuir a la qualitad che vegnia purschida en il Grischun e lura er a l’innovaziun da blers purtaders dal turissem. Investar saja però er in tschert ristg, ha ditgl Caduff. El ha tuttina cusseglià als turistichers d’esser vinavant innovativs. Il schef dal departament da l’economia publica ha ditg: «Sajas tuts curaschus.» Il Lumnezian ha er menziunà ch’el vegnia a sustegnair tuts quels ch’investischian, quai tenor sias forzas e pussaivladads, ha accentuà Caduff.

pagina 12