Viva Lia Rumantscha a Sevgein

(cp) En vesta dil grond giubileum da 100 onns viseta la Lia Rumantscha las valladas romontschas per s’entupar, discutar e seregurdar dad eveniments che capetan di per di en Romontschia. Gliendisdis, ils 27 da matg envida l’organisaziun tetgala dallas Romontschas e dils Romontschs ad ina sera da cumpignia en halla polivalenta a Sevgein. Per divertiment musical procuran Alexi e Marcus.

La Lia Rumantscha envida cordialmein alla sera da cumpignia «Viva Lia Rumantscha» da gliendisdis, ils 27 da matg en halla polivalenta a Sevgein. Naven dallas 19.00 informeschan vus Martin Gabriel, secretari general dalla Lia Rumantscha, ed Andreas Gabriel, il menader da project, davart il festival «100 onns Lia Rumantscha» che ha liug digl 1. entochen ils 18 d’uost a Zuoz. Per divertiment musical procuran Alexi e Marcus ch’ein gia dapi 35 onns ensemen sin tribuna e ch’edeschan prest lur 5avel portatun.

In schatg tut special ei la presentaziun dil toc da teater «La talpa sentenziada» che la scola primara da Sevgein e Riein ha giugau igl onn 1989 sut la reschia da scolast Thomas Beer. Ina rolla centrala en quei toc ha denter auter la presidenta communala actuala dad Ilanz/Glion, Carmelia Maissen, giu. La Televisiun Rumantscha ha giu filmau las scenas ed ussa – 30 onns pli tard – eis ei uras da seregurdar da quellas. L’Uniun da dunnas da Sevgein procura pil beinstar corporal ed organisescha quella sera in menaschi d’ustria.

La Lia sin via

Duront il di ein ils promoturs regiunals dalla Surselva, Alice Bertogg e David Flepp, da viadi tras las fracziuns dalla vischnaunca dad Ilanz/Glion. Tgei dat ei ad ina fiasta da natalezi? Giebein, petta e caffè! E quei surveschan ils promoturs gliendisdis, ils 27 da matg els suandonts loghens:

09.00–10.00 Rueun: avon igl anteriur Volg

10.30–11.30 Ruschein: sin plaz cadruvi sper il begl

13.30–14.30 Glion: sper il begl sin plazza cumin

15.00–16.00 Luven: sper il begl amiez vischnaunca

16.30–17.30 Pitasch: amiez il vitg

19.00 Sevgein: halla polivalenta – prolog pil giubileum

Dapli informaziuns davart il festival «100 onns Lia Rumantscha» digl 1. entochen ils 18 d’uost a Zuoz e prevendita dils bigliets pil teater «Tredeschin Retg»: www.100onns.ch