Iniziativa vul reintroducir il surmiran en scola

(rtr) A Surses duain ils scolars puspè avair scola en lur idiom surmiran enstagl da rumantsch grischun. In comité haja lantschà in’iniziativa dal pievel. A partir da l’onn da scola 2020/2021 duain scolars da Surses puspè avair scola per surmiran e betg pli per rumantsch grischun. L’iniziativa dal pievel na sa drizzia però betg cunter il rumantsch grischun, vegn Simon Bergamin – in dals iniziants – cità en la gasetta. La finamira da l’iniziativa saja da rinforzar l’idiom surmiran e da mantegnair ina part da la cultura.

Ord vista giuridica na stettia nagut en ils pes per midar la lingua da scola dal rumantsch grischun a l’idiom surmiran. Tenor la constituziun chantunala possia numnadamain la vischnanca decider davart quai, scriva la «Südostschweiz» vinavant. Per che l’iniziativa reusseschia stoppian 100 persunas cun dretg da votar a Surses suttascriver l’iniziativa.