Ambassadurs romontschs a Berna

(anr/abc) 70 vuschs han resunau dumengia vargada en ed avon la baselgia principala da Berna. Il chor viril Ligia Grischa ha dau concert ella capitala ensemen cul chor mischedau Pro Arte da Berna. Omisdus contan sut la bitgetta da Christoph Cajöri. Il Münster da Berna ei la pli gronda ed impurtonta baselgia dil temps medieval tardiv dalla Svizra. Semegliont sco la baselgia da Notre-Dame da Paris eis ella in monument historic marcant ed ils Bernes ein fetg attatschai a quel. Dumengia vargada ha il chor viril Ligia Grischa schau resunar leu «Il pur suveran». Gia avon 120 onns, a caschun dalla fiasta federala 1899, havevan els cantau en quei liug quella canzun che Hans Erni haveva cumponiu aposta cul text da Gion Antoni Huonder. Igl ei pia buca l’emprema gada ch’il chor sursilvan ei viagiaus ella capitala. L’emprema gada ei quei stau igl onn 1864. Lu fuva la Ligia Grischa separticipada alla 2. Fiasta federala da cant. Gion Antoni Huonder haveva scret ina poesia per quella caschun, il cumponist turitges Ignaz Heim la musica leutier. Cun «A Trun sut igl ischi» havevan ils 23 cantadurs fatg gronda sensaziun e rendiu honur alla Romontschia. Als chors grischuns ha quei success d’avon 155 onns dau in grond stausch.

Pli tard ei la Ligia Grischa separticipada aunc duas gadas a fiastas federalas a Berna, e quei ils onns 1899 e 1948. Dumengia vargada ein ils 70 cantadurs digl onn da cant 2018/19 sepresentai el chor dil Münster da Berna. Pia suenter 71 onns puspei ina presentaziun en quei edifeci historic. Suenter in cuort exercezi che Christoph Cajöri ha fatg cun omisdus chors – en tut 140 persunas – ein ils bauns s’empleni. Cu il concert ha entschiet allas 17.00 fuvan varga 700 persunas en baselgia. Ils chors han schau resunar l’oraziun «Gospodj pomiluj». Il program dalla Ligia Grischa ei staus semeglionts al concert d’in’jamna avon a Glion. Il chor partenari Pro Arte ha medemamein cantau canzuns sacralas russas. Ella baselgia gotica culs aults pilasters ed arviuls han omisdus chors implorau, urau e ludau cun canzuns ord la liturgia da Chrisostomus. La Ligia Grischa ha era schau resunar canzuns profanas, denter auter la populara «Schi lunsch naven» da Tumasch Dolf. Suenter il concert en baselgia ha il chor sursilvan dau in cuort concert spontan avon il portal dil Münster. Denter autras han tschiens persunas giu tschaffen dil himni «Schi ditg che stattan cuolms e vals» e secapescha «Il pur suveran» da Hans Erni. L’acustica sil Münsterplatz ha dau ina impressiun digl eveniment che fuva staus 1862 a Berna el medem liug. Cun quei viadi ha il chor viril Ligia Grischa concludiu il program digl onn da cant 2018/19. Il niev onn 2019/20 entscheiva ils 26 d’october culla radunonza generala.