Puspei spiars cun 
in gol differenza

Da GABRIEL DERUNGS

Ei duei semplamein buc esser. Puspei spiars in impurtont giug cun in gol differenza – e puspei han las absenzas da giugadurs blessai giugau ina memia gronda rolla. Aschia han omisdus attaccaders da tschep, Yanick Demont ed Attila Truffer, stuiu desister da quei giug muort blessuras. Ina schliata premissa per quella partida ch’ei stada zatgei sco il giug dalla davosa speronza pils Lumnezians.

Avon pausa giug fetg uliv

Ni als indigens ni als hosps reussescha ei d’elaborar claras schanzas avon pausa. Il giug sespleiga per gronda part enamiez il plaz e las duas defensiuns prestan buna lavur ed impedeschan ils attaccaders da vegnir ella zona da prighel. La megliera schanza han ils Lumnezians ella 32. min. Sin in bi pass da Mauro Demont metscha Dino Blumenthal dalla defensiun indigena ed aulza denton siu siet sul gol ora – munchentau ina biala pusseivladad dad ir en avantatg. Aschia schabegia quei ch’ei gia capitau pliras ga als Lumenzians: Ella davosa minuta dall’emprema mesadad va igl adversari en avantatg: Nikola Rikic nezegia ora ina malcapientscha ellas retschas dils Lumnezians e marca il gol d’avantatg per sia squadra.

Il giug vegn pli e pli dirs

Suenter pausa emprova Lumnezia da rinforzar l’offensiva per dar la midada al giug. Malgrad tuttas stentas vegnan els denton strusch tier claras schanzas da marcar. Da menziunar ei era che Walenstadt ha buc adina teniu en las reglas da fairness, quei che semuossa ellas biaras cartas ch’els han recaltgau el decuors da quei giug, numnadamein siat melnas e schizun ina cotschna (ella 88. min.) Dalla vart dils Lumnezians ha ei dau duas cartas melnas. Ella 56. min. vegn danovamein Nikola Rikic da spedir il bal ella reit suenter in corner: 2:0 per Walenstadt. Quei ch’ei denton adina puspei d’admirar tiels Lumnezians: els cedan mai. Aschia era en quei giug. Ella 73. min. survescha Pascal Derungs in bi pass a Simon Casanova ed a lez gartegia in bi siet el cantun liung. Nova speronza – la quala ei denton puspei vegnida sminuida cura ch’il giugadur da clav Mauro Demont ha stuiu bandunar il plaz ella 80. min muort ina blessura. Era la carta cotschna da Walenstadt ella 88. min. ha buca pudiu dar la midada, aschia ch’il giug ei ius a fin culla victoria per Walenstadt ed ina nova trumpada pils Lumnezians. Quels treis puncts pils da Walenstadt dattan a lezs nova speronza ella lutga encunter la relegaziun e per Lumnezia ei la situaziun daventada aunc pli precara.

Walenstadt – Lumnezia 2:1 (1:0)

Plaz Exi, Walenstadt, 200 aspectaturs. Arbiter: Zanatta Christian

Walenstadt: Gzin Ademi; Marco Sestito, Andreas Gmür, Daniel Jud, Benjamin Jud (70. Mirko Pfiffner); Vlado Krbanjevic, Romano Broder, Gian Luca D’Agostini (93.Mihal Velija), Alessandro Bühler; Nikola Rikic, Enrico D’Agostini.

Lumnezia: Mark Martin; Mauro Cadonau, Remigi Collenberg, Matias Alig, Dario Capaul; Paul Alig (55.Pascal Derungs), Dino Blumenthal, Tizian Casanova, Danilo Blumenthal; Mauro Demont (80. Ronny Cadonau), Nando Blumenthal (60. Simon Casanova).

Cartas : Walenstadt: 7 melnas ed ina cotschna, Lumnezia: 2 melnas