Tarvaschegns digl vaschinadi da Maton

(anr/bt) Igl tarvaschegns da Maton digls 20 da matg â gieu da tractar igl quent anual pigls 2018. El â ear apruvo la restructuraziùn digl zenter d’atempos Glienda d’Andeer a la midada partutgànt igl cudesch funsil.

A l’antscheata digl tarvaschegns â Lilian Würth infurmo partutgànt igl svilup digl project «Tgea digl Tgànt». Igl cunzegl da fundaziùn da quella e vagnieu cumpleto cun Andreas Heggendorn, parsura da Maton. Savund Würth vigni que cunzegl ussa a vagnir activ par rimnar daners suainter aver fatg igl quent da manaschi. Igl quent anual digl vaschinadi seara cun expensas da bundànt 600 000 fràncs. Igl surple d’antradas amporta 70 000 fràncs. Igl quent e vagnieu prieu par bien.

Igls vaschegns en vagnieus infurmos davart la veia natirala a Gurschegn ca vess da vagnir reparada. La cuvrida natirala caschunass custs da var 12 000–15 000 fràncs, las sdremas da betùn 92 000–96 000 fràncs. Savund igl parsura e que project vagnieu mess anavos antoc’igl vaschinadi segi fusiuno.

Alura e’gl vagnieu infurmo c’igl toc da la veia da Gurschegn ca vean actualmeing refatg caschùni egn surple da custs da 50 000 fràncs. Igl preventiv calculava cun 247 000 fràncs. Igls custs suplementars detigl parquegl c’igl vegi da vagnir fatg diversas lavurs suplementaras sco mirs a fundamaints, lavurs c’ign vegi betga savieu prever. La tractànda partutgànt schliear igl cudesch funsil Ragn posteriur cun sedia ad Andeer â caschuno egn’extendida discussiùn. Igl manader da quel, Hanspeter Nigg, vean pensiuno igl on proxim ad e actualmeing sulet da manar que ufezi, cun la consequenza c’igl dat nign supleant. Senaquegl en igls vaschinadis cumpaglieus vagnieus dumandos da saculiear cugl ufezi digl cudeschs funsil da Tusàn. Igl vaschinadi da Maton â apruvo quella proposta sco amprem vaschinadi da que consorzi.

Sut varia e’gl vagnieu infurmo davart la nova adressaziùn digls bietgs ca sto vagnir standardisada savund las parscripziùns digl cantùn ad igl â da vagnir scumpartgieu numeras pigls bietgs. Las veias vignan numnadas scha pussevel cun mantaner igls nums existents near safundànd segl usito digl liac.

Plenavànt e’gl vagnieu infurmo c’igl vaschinadi vigli instalar egna cumoditad sper igl Libì. Quel vigni fatg an egn bietg da len ca safetschi bagn cun la cuntrada.

An l’antrada da la vischnànca vut ign farmar tavlas ca vignan ad infurmar sur da las activitads a purschidas da Maton. «Nus lagn ca la glieud ca vean se Maton setgi tge ca vigni purschieu a qua», gi Heggendorn.